I GAT ol gutpela sevis long ples mi kam long en tasol mi laik stap hia long dispela distrik bikos mi laik long
wok long rurel ples.

Mi save laik long lukim ol smail long pes bilong ol pipel na dispela i save givim mi
planti amamas na kirapim bel bilong mi long mekim dispela wok moa yet long sevim ol pikinini long ol
komyuniti.
Dispela em ol toktok bilong wanpela daunpasin helt woka husat i save wok hat olgeta taim. Em i givim
planti taim long laip bilong em long helpim long apim helt kea na welbing bilong ol pipel long ol
komyuniti em i wok long en.
Nem bilong dispela woka em Nancy Kingal. Nancy i gat 34 krismas na em i kam Westen Hailans Provins.
Nancy em i wanpela Komyuniti Helt Woka na nau em i wok olsem het nes bilong helt bilong ol mama na
pikinini long Kapo sab-helt senta long Menyama, Morobe Provins. Em i stap 15 krismas pinis long dispela
distrik.
Man bilong Nancy i dai pinis na em i stap wantaim foapela pikinini bilong em. Laik bilong em long wok
wantaim ol pipel i bin stat taim em i skul long kamap nes long Gaubim Komyuniti Helt Trening Skul long
Karkar Ailan, Madang Provins.
Long dispela hap em i bin laitim Kendal na tok promis long wok long helpim ol pipel long wanem hap ol i
salim em. Em i bin greduet long 2008 na ol i salim em long Menyamya na em i stap nainpela yia na
mekim wok bilong mobail klinik. Long 2017 ol i bin salim em i go long Kapo Sab-Helt Senta long lukautim
wok bilong helt bilong mama na pikinini.
Ol wok bilong Nancy long wan wan de em olsem; kodinetim ol wokabaut patrol, helpim mama karim
pikinini, sekim ol bebi, mekim imunaisesen, mekim famili plening na tritim ol sik manmeri na pikinini
long autpeisen.
Menyamya em i wanpela hatpela ples long wok long en. Wok manmeri tu i sot. Na tu dispela helt senta i
nogat ambulens, pawa na wara olsem na wok bilong Nancy i no save isi.
Tasol dispela ol salens i no stopim Nancy na tim bilong em long bringim helt sevis olsem imunaisesen i go
stret long haus dua bilong ol pipel long ol komyuniti.
“Sampela taim mipela save wokabaut tripela de o faivpela de na mipela i save malolo tasol taim ples i
tudak. Taim mi wokabaut mi save go wantaim ol helpim bilong mi husat i save karim ol veksin na mipela
i save go long ol ples insait tru olsem bai ol pipel, na moa yet ol mama na bebi, i ken kisim ol helt sevis ol
i nidim, Nancy i tok.
Nancy wantaim tim bilong em i save wok hat long lukim olsem olgeta pikinini husat i gat faiv krismas o
aninit long en i kisim veksin aninit long Accelerated Immunization and Health System

Strengthening (AIHSS) program. Dispela program em Gavman bilong Australia, Nu Silan na Gavi-
the Vaccine Alliance fandim na teknikol sapot i kam long World Health Organization, UNICEF
na World Vision olsem implementing patna long Morobe Provins.
Kain pasin bilong em long wok long lukautim ol pipel i soim tru bel na laik bilong em na em ol wanpela
kain lida insait long wok bilong em olsem nes. Nancy em i wanpela bilong ol planti arapela meri insait
long Papua Niugini husat i soim tru lidasip husat i save wok hat long kamapim ol gutpela autkam long
gutpela bilong ol pipel.
“Maski mi meri na maski ol salens i stap, mi save lusim ol pikinini long haus na kisim risk long wanem mi
laikim dispela wok bilong mi. Na mi save amamas taim ol komyuniti i tok ‘tenkyu’. Mi save pilim long bel
bikpela amamas taim ol pipel i smail,” Nancy i tok.
Long PNG ol meri i save karim kainkain wok long helpim long groim ikonomi bilong kantri. Na ol i save
wok bung na go pas long putim kaikai long haus bilong famili bilong ol, ol komyuniti bilong ol na tu long
sosaiti.
Olsem na taim yumi amamas long Wol Imunaisesen wik dispela yia, yumi amamas tu long ol meri olsem
Nancy long kain salens envairomen.