GET Safe Online (GSO) Pasifik em i projek bilong ogenaisesen i stap long United Kingdom (UK) ol i kolim “Get Safe Online”. Dispela ogenaisesen i save promotim seifti bilong yusim intanet long UK.

Long 10-pela mun i go pinis, GSO i bin wok long operet long 9-pela kantri insait long Pasifik Ailan. Ol dispela kantri we ol i memba bilong Komonwelt.

Long Mande 17, 2021, taim NICTA i amamasim “World Communication and Information Society Day” GSO i bin lonsim Tok Pisin websait long Papua Niugini. Astingting bilong dispela em bilong givim ekses long bikpela populesen bilong PNG long ritim na kisim klia tingting long ol hevi i save kamap long taim ol pipel i yusim intanet na ol rot bilong abrusim.

“Mipela i amamas tru long lonsim Tok Pisin websait long PNG” Jenny Thornton, Het Intenesenel Rilesen bilong GSO i tok.

Em i tok Ogenaisesen i wanbel tru long wok bung wantaim NICTA long karimaut ol seifti toktok bilong yusim intenet long PNG.

Sif Ekseketiv Opisa bilong NICTA, Kila Gulo-Vui i tok “Saibasekyuriti na seifti  em i namba wan samting long gavman bilong PNG. Em i moa impoten tu long dispela taim we olgeta sevis bilong gavman i wok long go onlain. Mipela i amamas long wokbung wantaim GSO bikos program bilong ol i helpim gavman long skulim ol pipel long gutpela rot bilong yusim intanet ”.

Websait bilong GSO em i isi long yusim. Em i givim ol isi rot bilong yusim kain kain onlain sekyuriti isiu. Kain olsem rot bilong lukautim paswot na long mekim ol seif transaksen na moa. Long wankain taim tu sevis bilong em i fri long yusim.

British Hai Komisin i bin sapotim lonsing bilong GSO Tok Pisin websait. Keith Scott, British Hai Komisina long PNG i tok “ Mi amamas olsem fanding bilong UK i sapotim dispela wok. Promotim intanet seifti yusim Tok Pisin em i namba wan rot bilong skulim bikpela populesen bilong PNG. Moa yet long ol yangpela, bai ol i ken save long en na lukautim ol yet long ol hevi bilong intanet”.

Em i tok tenkyu long Digicel PNG long sapotim lonsing bilong GSO long PNG.

Yusim intanet em i gutpela samting, tasol yumi mas yusim wantaim tingting na lukaut long ol hevi we i save kamap.

Long yusim na save moa long GSO, visitim websait long www.getsafeonline.org.pg

Carolyne Ketsimur i raitim