“EM i namba wan taim BSP i sainim kain MOU wantaim  gavman ogenaisesen. BSP i amamas tru long karimaut dispela dijital peimen solusen wantaim dipatmen bilong Fainens,”

BSP Grup Ekseketiv Opisa, Robin Fleming i bin mekim dispela tok taim BSP i bin sainim MoU wantaim Dipatmen bilong Fainens long kamapim gutpela dijital peimen solusen long ol non-takis mani bilong gavman.

Fainens dipatmen nau i ken  kisim ol peimen aninit long BSP onlain web sevis, Kiosk peimen na Mobail benking.

“Ol dispela peimen rot bai go wantaim ol kain kain sekta we i mekim ol peimen bilong ol. I gat yet peimen rot bilong ol lain i stap long rurel eria long yusim mobail peimen na Kiosk na ol lain i stap long siti,” Mista Fleming i tok.

Ol non-takis peimen olsem polis kliarens, fain, ol bail, paspot, rent bilong graun, maigresen sevis fi, wok pemit, petroleum eksploresen laisens sas na fi olgeta bai mekim peimen aninit long dijital peimen solusen.

BSP Jenerel Menesa Dijital, Nunu Kulu i tok dispela peimen solusen bai kamapim trensparen peimen tresing na peimen bilong gavman bai go antap bikos kantri bai gat ekses long yusim. Dispela em bai sevim taim na kos.

Websait bilong Dipatmen bilong Fainens i kamap pinis na ol i mekim mekim bai inapim  olgeta gavman sevis. Dispela bai strongim revenyu bilong kantri.

Dokta Ken Ngangan, Seketri bilong Fainens i tok peimen solusen bai kisim ol non-takis mani long rait taim bilong impruvim wok bilong gavman na helpim long stretim baset.

Minista bilong Fainens, John Pundari i bin tok amamas tru long Fainens dipatmen na BSP long sainim dispela MoU we bai helpim tu long impruvim gavanens long kantri.

Carolyne Ketsimur i raitim