NUPELA  kakao baiya depo long Usino, Madang Provins i givim nupela laip long ol fama.

Linguan em kampani i go pas long depo.

Baia nau i sevim stret ol kakao fama long Usino-Bundi distrik na ol arapela tu long Midel-Ramu distrik.

Linguan bosman, Michael Linguan i tok kamap bilong ol long Usino i bihainim wanpela agrimen we Minista bilong Edukesen na MP bilong Usino-Bundi, Jimmy Uguro i bin sainim wantaim PNG Kakao Indastri Bod long givim laisens long ol long opim baiya depo long Usino  stesen.

“Mipela i opim dua na baim kakao long ol rural fama bikos Uguro i askim mipela long kam,” em i tok.

“Mipela i laik givim sevis long baim drai bin kakao.”

Presiden bilong Usino LLG, Peiwa Aimai i askim ol lokal komyuniti long Usino long lukautim gut dispela egrikalsa sevis em Uguro i bringim i go insait long distrik.

“Memba i bringim sevis i kam klostu long haus dua bilong yupela na olsem yupela i mas lukautim gut,”  Aimai i tok.

Uguro aninit long distrik divelopmen plen i bin wok wantaim PNG Kakao Indastri Bod (PNGCIB) long givim laisens long Linguan kampani long baim kakao long distrik.

Wod 17 kaunsila long Iguruwe viles, Pomai Noyesia i amamas long kamap bilong Linguan.

Em i tok depo bai helpim ol rural kakao fama long daunim kost bilong wok bilong ol.

Ol i no inap karim kakao bilong ol na go longwe moa olsem long Madang taun na lusim mani long trenspot.

“Mi amamas bikos mi go salim kakao bilong mi na ol baim mi stret,” Pomai i tok.

“I nogat wanpela midel man i stap na kisim nating mani.”

Em i amamas long Uguro long bringim dispela drai kakao baiya long distrik.

James G. Kila i raitim