INSAIT long wanpela pas bilong en long ol patna na ol pasindia bilong en, MAF i toksave olsem em i ken wokim ol COVID-19 tes nau.

Em i tok ol oda bilong Nesenel Kontrol Senta bilong COVID-19 o NCC i tok olgeta pasindia husat i laik kalap long balus long go long wanpela hap long PNG i mas kisim tes bilong COVID-19 na tes ripot bilong ol i mas negetiv. MAF i luksave olsem em i hat long planti rurel pipel long kisim dispela tes long planti hap.

MAF i tok, “Mipela i kisim tok orait long NCC long mekim COVID-19 tes long ol pasindia na mipela i mekim dispela ol tes long Mt Hagen na Telefomin. Lukluk ol tes kit mipela i gat mipela i givim praioriti long ol isensiel wok lain olsem ol helt woka na tisa husat i mas go long ol rimot komyuniti.

Mipela i luksave olsem ol pasindia bilong mipela long ol rimot ples i no inap trevol long ol balus bilong mipela long wanem i no gat fesiliti bilong kisim COVID-19 tes. Mipela i toktok wantaim NCC na mipela i wet long disisen bilong en.

Long dispel taim tu mipela i go het long pre long wisdom long nesenel lidasip taim ol i mekim ol disisen. Mipela i pre tu long ol prektikel autkam bilong ol pipel bilong mipela long ol rimot ples na ol rurel pasindia i ken yusim ol sevis bilong mipela.