SIVIL Eviesen Minista Sekie Agisa i mekim namba wan ministerial raun bilong em go lukim Nadzab Epot Ri-development Projek las mun.

Mista  Agisa i bin go bungim Nesenel Eapot Koporesen (NAC), Japan Intenesenel Koporesen Ejensi (JICA) projek Implementesen yunit na ol wokman na projek Kontrakta Dai Nippon Nippo Joint Ventsa.

Dispela  em i namba wan raun bilong Minista Agisa i go long dispel projek na em i kisim stretpela infomesen na lukim stret wok i go olsem wanem.

Minista i stetim olsem em i amamas long lukim wok i go gut maski wok i bin stop bikos long COVID-19 lokdaun long 2020.

JICA na Papua Niu Gini Gavaman i fandim dispela Nadzab Eapot Ri-developmen Projek wantaim K692 million.

Taim wok i pinis long Nadzab, dispela Eapot bai i gat spes inap long kisim bikpela balus B737 na tu em bai ken kisim ol narapela bikpela balus we i save pundaun long Jackson Eapot tasol.

Ol balus olsem B767, B777 na B787 em ol bikpela balus we Pot Mosbi tasol save kisim bai kam long Lae tu.

Nau nupela Nadzab Epot bai isi long lukautim bikpela namba bilong ol pasindia na kago samting bilong ol pipel insait long Momase na Hailans rigen, na tu apim ikonomik wok insait long dispela tupela rijon.

NAC i bin winim Nadzab Eapot Ri-developmen Kontrak long Novemba 2019 na ol i ting wok bai pinis long Novemba 2022 wantaim kontrakta, Dai Nippon Nippo Joint Ventsa, tasol COVID-19 i mekim na kirap bilong 2020 wok i bin pas olsem na nau wok bai pinis olsem long Epril 2023.

Na long stat bilong mun Me, Nadzab Eapot reskiu tim i putim faivpela nupela yangpela man husat i pinisim Besik Paiaman Trening long joinim tim bilong ol long Nadzab Eapot.

NAC i lukluki go het long lainim ol dispela yangpela moa long wok bilong paiaman na lukim ol bai kamap gutpela long wok bilong ol.

Penelope Aimari i raitim