PNG Kakao Bod Sif Ekseketiv Opisa Boto Gaupu i tok Kakao Prais Sapot Program bilong Marape Gavman bai apim kakao prodaksen long Morobe provins.

Em i mekim dispela toktok long taim em i makim maus bilong Egrikalsa na Laipstok Minista John Simon long lonsim program long Munum viles long Markham veli.

Bihain long dispela lonsing Gaupu i givim K200, 000 moa long kakao prais sapot i go long 8-pela distrik bilong Morobe long sapotim wok kakao long provins.

Gaupu i tok prodaksen bilong wok kakao long Morobe i go antap long 4500 tan na veliu olsem K30 milien.

Kakao Bod CEO i tok K19 milien bilong dispela mani i save go stret long poket bilong ol fama. Namel long 10-15 yia kakao prodaksen long Morobe i go antap long 800 tan na 1000 tan.

“Mi tok olsem inkris long 4400 tan em i olsem K30 milien long ekspot revenyu,” em i tok.

Long K30 milien K18-K19 milien i save go long ol fama long ol distrik. Kakao i save helpim ol ikonomik ektiviti olsem stoa, PMV na ol narapela wok bisnis na tu i save helpim GST bilong gavman wantaim.

COE Gaupu i tok Markham distrik nau i go pas long kakao prodaksen long Morobe wantaim hap bilong total prodaksen bilong provins.

Morobe em i nupela provins bihain long Is Nu Briten, Bogenvil na Is Sepik nau i wok long go pas long kakao prodaksen insait long kantri.

“Mi bilip olsem Morobe wantaim sapos bilong olgeta fama i ken go antap long 10, 000 tan we i ken bringim moa long K100 milien i kam insait long provins,” em i tok.

Gaupu i tok dispela em i daireksen bilong Minista Simon olsem benefit bilong prais sapot mas go long ol fama long asples stret.

“Mipela bai i no inap involvim ol ekspota. Ol ekspota i bilong kisim volum ol fama i wokim long salim tasol,” em i tok.

Benefit bai go stret  long ol asples. Dispela em wanpela samting dispela gavman i mekim kamap.

Gaupu i tok tenkyu long Praim Minista James Marape long kamapim kain samting olsem.

“Praim Minista Marape i  tok olsem em i laik long lukim risalt pastaim long em i givim moa mani na wok bilong kakao long provins i wok long karim gut kaikai bilong hatwok bilong ol fama.

“Wok i  stap long han bilong ol fama olsem na yumi mas wok long mekim dispela wok kakao indastri i go bikpela na strong,” em i tok.

Joseph Dawai i raitim