EU-STREIT long PNG i wok long go het yet long karimaut ol veliu sen ektiviti bilong kakao, vanila na fiseris long ol rurel komyuniti long Sepik.

Long pinis bilong Mun Epril, ol opisa bilong EU-STREIT i bin go long  Karawari LLG klostu long Sepik wara na ranim trening bilong “Vanila kaltivesen, Hasbenderi na Prosesing”. Dispela trening i bin pulim 100 rurel fama bilong ol 20 ples na olgeta i bin bihainim ol mesa bilong COVID-19 long taim bilong trening.

Karawari i stap long Angoram Distrik long Is Sepik provins na i serim boda wantaim hailans. I no gat rot na no gat liklik ples balus. Ol pipel i save wokabaut tasol o pul long kanu bihainim Sepik wara na bihain wokabaut bihainim gen ol liklik bus rot.

Long taim ol pipel i bin harim toksave bilong trening, ol i wokabaut long sampela de i kam long ples bilong ranim trening. Sampela fama i kam long boda bilong Enga provins long lukluk tasol na kisim save na sampela i kam long trening.

Trening i bin kamap long tupela hap, tiri o skul toktok na praktikal. Ol kisim trening long kaltivesen (hau long painim gutpela graun bilong planim, spes bilong planim na hau long planim), Hasbenderi na Menesmen (hau long kontrolim sed, Malsing na Polinesen), Prosesing (kiling, draing na peking).

Tombe Pasu, Dairekta bilong Karawari Tropical Vanilla (KTV) i tok “vanila i gat gutpela veliu na tu em i isi long trenspotim. Ol pipel bilong mi i ken karim long ples i go long maket wantaim liklik kost,”.

Kakao i bin bikpela rot bilong 15,000 pipel bilong Karawari LLG long kisim mani, tasol taim sik nogut bora i bin kamap na bagarapim ol kakao, olgeta i muv i go long vanila.

Charlie Wemon opisa bilong Angoram Distrik Dipatmen bilong Egrikalsa na Laipstok na Jason Handikiang makim opis bilong Gavana i bin stap wantaim EU-STREIT long dispela trening.

Mista Handikiang i tenkim European Union (EU) long fandim dispela rurel egrikalsa divelopmen program long sapotim ol fama. Na em i tenkim tu UNFAO long go pas na karimaut dispela program.

Sinia Egrikalsa Opisa bilong program i tok, “vanila em i gutpela krop i gat veliu na i save kamap gut long Sepik, tasol bikos i no gat gutpela kwaliti kontrol mesa na gutpela maket na prais i pundaun. Dispela trening nau bai helpim long bringim bek level bilong kwaliti na gutpela prais bilong vanila olsem bipo,”.