“LOGING sekta em wanpela sekta we i gat hevi bilong takis komplaiens. Na long wankain taim, em wanpela sekta we i save kisim rifan bilong takis planti taim”.

Komisina Jenerel bilong IRC i mekim dispela tok long Mande. Em i tok dispela sekta em i hai-risk sekta we i nidim atensen bikos long ol paul wok bilong em.

IRC i tokaut klia olsem i gat 20 loging kampani i stap aninit long odit. Bihain long odit, IRC bai karimaut sampela eksen long ol dispela kampani.

“Long ol yia i go pinis, ol loging kampani i no save baim kopret inkam takis. Grup salari na wejes takis ol i save baim em daunbilo tru long leba-intesiv bilong operesen na ekspot inkam ol i save kisim. Dispela i tokim mipela (IRC) olsem ol dispela loging kampani i stap long bikpela daiet long hau ol i yusim mani bilong ol, tasol taim yu lukluk gut, tru tru ol i wok long kisim moa weit o moa mani. Mipela i laik mekim wok painimaut long dispela na stretim,” Mista Koim i tok.

Komisina Jenerel i tok tu olsem “maski ol i no save baim takis, ol i save kisim planti GST rifan long ol  yia i go pinis”.

Em i tok bikos long dispela hevi, olgeta klem bilong GST rifan bai go long odit.

“Mipela i putim dispela hevi i kam ples klia nau. Mipela bai mekim odit long ol 20 loging kampani na bai mipela edim moa kampani long taim mipela go hetim wok bilong oditing,” Mista Koim i tok.