LONG Goroka, Isten Hailans i gat planti gutpela wok bilong mekim na kisim liklik mani long sait bilong kopi na egrikalsa faming, lukautim ol kakaruk, pik, meme, pato, kau, pis na ol arapela gutpela wok moa bilong strongim na kamapim gutpela sindaun long wan wan komyuniti.

I no long dispela tasol. I gat ol narapela rot tu em i stap na dispela em wok bilong florikalsa o wok bilong kamapim na groim ol plaua.

Dispela bisnis bilong plaua em i wok long kamap bikpela tru long Goroka we planti mama long viles na hauslain i mekim na i wok long kisim helpim long em.

Linda Noken em i wanpela mama long Notofana hauslain long Goroka yet we em i wok long mekim dispela bisnis bilong florikalsa.

Bikos long gutpela na naispela plaua em i wokim, ol bikpela opis long taun olsem Isten Hailans Provinsal Helt Atoriti (EHPHA) na Air Niuigini long Goroka i kisim em long bilasim opis bilong ol wantaim ol plaua long wan wan wik.

Noken i tok em i amamas long mekim dispela wok, long wanem, dispela em wok we em i save laikim tumas long mekim.

Em i laik surukim florikalsa wok i go het sapos ol arapela opis, stua, hotel, geshaus, skul, sios na ol arapela lain moa i askim em long bilasim opis bilong ol.

Sape Metta i raitim