FAIVPELA kopi fama grup long Jiwaka Provins i kisim wan wan masin bilong milim kopi long Coffee Insdustry Corporation (CIC) intavensen program bilong helpim ol long prosesim ol kopi bin bilong ol.

Minista bilong Egrikalsa na Laipstok, John Simon i opim dispela iven long Nondugl Kaunsel Semba. Ol dispela grup em Waka, Numkussy, Opka, Kumbal Kopong na Konum kopi kopretiv.

Mista Simon i bin tokim ol fama olsem gavman i sanap strong long inves i go bek long egrikalsa sekta olsem na ol pipel i mas stopim pasin bilong raun na sindaun nating na wetim gavman long givim fri mani.

Long taim bilong bung long Nondugl, Mista Simon i tokim ol pipel olsem ol i no nidim save man long tokim ol rot bilong planim kopi. Save na skil na graun i stap redi pinis wantaim ol fama.

Em i tok driman bilong gavman em long bringim prais bilong kopi i go long K5 na K6 na nau dispela i wok long kamap tru tru. Mista Simon i tok nau em i laik surukim prais i go antap moa yet.

“Mi askim yupela long stat klinim na lukautim ol kopi gaden bilong yupela. Gavman bai inves long dispela projek bilong helpim ol fama long kisim gutpela prais bilong kopi. Mipela bai go het yet long sapotim dispela program,” Mista Simon i tok.

Mista Simon i askim ol pipel long Nondugl long sapotim CIC na Nesenel Egrikalsa Kwaretin Inspeksen Atoriti long wokbung wantaim na rausim kopi beri bora long provins. Em i tok gavman i laik stretim ol olpela plantesen  long bringim moa mani i kam long ikonomi.

CIC Ekting Sif Ekseketiv Opisa, Charles Dambui i tokim ol fama long lukautim gut ol masin bilong milim kopi bikos dispela bai helpim ol long taim bihain.

Long wankain taim, 4-pela kopi kopretiv grup long Isten Hailans na Madang bai kisim ol kopi masin bilong ol tu. Dispela ol liklik masin i ken prosesim wanpela tan kopi long wanpela aua.