BALUS kampani, Missionary Aviation Fellowship (MAF) i amamasim 70 yia anivesari bilong em long wok long Papua Niugini.

Kampani i bin stat long Madang long 1951 aninit long lukaut bilong Harry Hartwig.

Long dispela taim, kampani i bin gat wanpela balus tasol long wok wantaim tasol tude em i gat moa balus.

I no longtaim i go pinis, kampani i kisim nupela Cessna 208 Caravans.

Kampani i save operet long planti hap bilong kantri stat long Westen Provins na i go long Bogenvil.

Long ol yia i kam, namba bilong ol balus kampani i gat i senis, tasol tingting bilong em long helpim ol manmeri na long autim tok na serim laik pasin bilong God na Jisas Krais, dispela i no senis.

Long ol las 70 yia:

Namba wan MAF balus i ran long Madang long 1951 em pailot Harry Hartwig i ranim.

Tingting bilong kamapim kain balus sevis i kamap taim sampela ol Kristen pailot i bung long Melbon, Australia long namel bilong 1940s.

Long dispela taim ol i toktok long yusim save bilong ol long taim bilong pait long wok long ol rurel ples.

Dispela i kamapim Missionary Aviation Fellowship kampani tasol long dispela taim ol i no klia long ol hap ol i mas wok long ol.

Long 1949 Harry Hartwig na Alex Freind i baim Tiger Moth we ol i yusim long mekim sevei (wok painimaut) ran long ol ples long noten hap bilong Australia.

Bihain long dispela ol i mekim wankain sevei long Teritori bilong Niugini.

Wantaim dispela ol sevei, ol i painimaut olsem gutpela hap bilong yusim save bilong ol wok long ol bus ples, moa long ol ples we i hat long ran em long Papua Niugini.

Ol i plen olsem Luteran Misin bai yusim planti sevis bilong ol wantaim kost bilong Auster Autocar balus wantaim ol masin em kampani bai yusim.

Harry Hartwig i namba wan MAF pailot wantaim yangpela famili bilong em we ol is tap long Madang long 1951.

Long Mei, 1951 Hartwig i yusim Auster balus VH-KAN long ran.

Stat long dispela yia, kampani i painimaut olsem i gat planti hap bilong kantri we i nidim tru sevis bilong ol.

Tasol long 6 Ogas, 1951, i gat ripot olsem ran bilong balus long go bek long beis long Madang long taim em i mas kamap i no kamap bihain long em i ran long Hailans rijon.

Long dispela taim, i no gat redio long balus na dispela inap stap nau olsem “mystery” tasol i gutpela bipo long ol i tok balus i bungim bagarap, wanpela skul tisa long Asaroka Gap long Daulo (Isten Hailans), i no tokaut olsem em i bin lukim balus i flai raun raun long ol klaut bipo long ol i harim wanpela pairap long Asaroka Gap long ol maunten bilong Daulo.

Bihain long wanpela na hap de ol i painim bodi bilong pailot na balus 100 mita daunbilo long gap.

Bipo long kain hevi i kamap, Harry i raitim wanpela profetik (tok piksa) toktok long wanpela ripot: “Lokal save long stap bilong ol de (weather) na ol bus i gutpela save long kamapim ol gutpela ran.”

Dai bilong pailot na na bagarap bilong balus bihain long tripela mun tasol bilong wok i bikpela lus bilong MAF long Papua Niugini.

Wantaim nogat inap mani na ol wok manmeri, MAF long Australia i tanim i go long MAF USA long kisim helpim. Dispela i mekim kampani i mekim sevei gen long ailan na baim nupela Cessna 170 we ol i putim wan wan ol hap wantaim long hangar long Madang na skruim gen ol ran bilong MAF balus.

Ol i skruim gen ol wok long 1952 wantaim helpim bilong pastaim Amerika ami pailot Charlie Mellis.

Wantaim dispela ol ran, planti ol ples long kantri i lukim na askim long kisim helpim we dispela i lukim ol i opim ol nupela ples long balus i ken ran na givim sevis.

Long dispela taim MAF i gat rekod bilong givim sevis long longpela taim na i amamas long amamasim 70 yia anivesari bilong em long ran.

Long dispela taim MAF PNG i amamas long yusim singel 9-pela Cessan Caravan, C208 ol balus long givim ol sevis olsem heltkea, edukesen, seif wara na autim Gutnius long ol bus ples.

MAF i go het yet long wok long bikples PNG na ol lokal komyuniti.

Inap long 100 nesenel wok manmeri, 35 intenesenel husat is tap long 11 ol hap, MAF i wok bung wantaim ol lokal sios grup, misineri, ol NGO, divelopmen na rilif ejensi na gavman dipatmen husat i wok wantaim olsem wanpela tim long senisim laip bilong ol manmeri long bus ples.

Visin bilong MAF em long lukim ol bus ples i kisim sevis long bodi na spirit olsem nem bilong Jisas Krais i bikpela na i serim laik bilong God.

Sampela ol aua bilong ran bilong balus

MAF PNG 2011 – 2020

• 68,496 aua bilong ran
• 320,650 pasindia i ran
• 13,525,809 i yusim kilomita bilong ran
• 19,758,892 karim mak bilong kago long ran
• 105,241 totel mak bilong ran

MAF PNG long 2021

• 9-pela balus
• 105 namba bilong ol ples balus long givim sevis
• 134 namba bilong ol wok manmeri (96 nesenel, 38 intenesenel)

MAF askim yu long serim testimoni bilong yu wantaim em

Long taim MAF PNG i amamasim 70-yia anivesari bilong em, e mi laik harim ol stori bilong yu. Dispela ol stori i ken pas long wok bilong helt, edukesen o wanem kain ekspiriens bilong yu wantaim 200 i go long 300 wods na yu ken raitim long English o Tok Pidgin.

Yu gat sampela ol olpela poto we yu laik serim wantaim MAF olsem histori na tokaut long ol wantaim stori bilong yu. MAF PNG i laik givim ona long ol husat i laik kam serim tingting bilong ol long MAF i min wanem samting long em.

MAF bai givim prais long ol husat i raitim gutpela stori na salim gutpela poto na ol bai putim dispela ol stori na poto long MAF PNG website na ol sosel media sanel olsem Facebook

Plis salim stori bilong yu bipo long Me i pinis na salim long dispela email edres: This email address is being protected from spambots. You need JavaScript enabled to view it. wantaim het tok “MAF PNG 70^th – testimony.”

Yu ken salim tu long MAF ‘balus’ o long PNG pos opis: Communications Department, MAF PNG Ltd, P O Box 273, Mt Hagen, WHP 281; yu ken save moa long MAF long dispela website www.maf-papuanewguinea.org