LONG Tunde dispela wik Praim Minista James Marape i lonsim Nesenel Rol-aut Program bilong COVID-19 Veksin long APEC Haus, Pot Mosbi.

Em i tok, veksin em i hap bilong nesenel COVID-19 rispon strateji.

Em i tok long stat yet nesenel strateji i toktok olgeta taim long ‘difens’ egens long spred bilong vaires.

Em i tok tenkyu long ol husat i helpim PNG long kisim ol veksin. Sampela dispela lain em World Health Organisation (WHO) na Australia gavman. Em i givim luksave long Praim Minista bilong Australia husat i wok hat long helpim PNG i sanap long lain bilong kisim veksin.

Mista Marape i tok COVID-19 veksin i stap nau redi long ol pipel i ken kisim tasol, “em i stap yet long laik bilong wan wan long kisim o nogat.”

Praim Minista i tok, “Nogat wanpela bai i pusim ol pipel long kisim veksin.”

Em i tok moa olsem em i bin laki long wanpela bilong ol pipel husat i kisim veksin pas.

Em i tok ol husat i no bilip olsem COVID-19 em i sik tru i ken painimaut long ol arapela husat i kisim pinis dispela sik na tu stori bilong ol husat i dai pinis long COVID-19.

Em i tok COVID-19 em i birua tru we i bagarapim pinis sindaun bilong ol pipel na ikonomi na wok i mas go het long stretim dispela hevi.

Inap long Mande dispela wik PNG i ripotim 11,273 keis bilong COVID-19 na 121 i dai pinis long dispela sik.

Nesenel Rol-aut bilong Veksin Program bai i gat tripela hap long en. Namba wan hap we i stat asde (Trinde). Em bilong banisim ol helt woka na ol isensiel non-helt woka. Namba tu hap we bai stat long Julai na bai pinis long Disemba em bilong ol manmeri husat krismas bilong ol i 45 na antap. Na namba tri hap we bai i stat long 2022 na 2023 em bilong olgeta manmeri husat krismas bilong ol i 18 na antap.