MANMERI i no ken pret long kisim coronavirus (COVID-19) banis sut, Is Nu Briten Provinsal Deputi Helt Edvaisa, Ben Moide i tok.

Em i tok manmeri i no ken paul long tambuim ol yet long kisim dispela sut.

Em i mekim dispela tok long las wik bihainim ol tok olsem dispela sut bai bagarapim ol.

Em i tok Helt Dipatmen i salim marasin AstraZeneca i go pinis long Is Nu Briten manmeri i mas kisim dispela marasin long banisim ol.

Moide i tok ol bai holim tupela-de trening long skulim ol heltwoka na tu long strongim tingting bilong ol.

Em i tok wantaim ol helt woka ol bai skulim ol long givim marasin long  ol hasik sik, long ol helt senta.

Em i tok ol bai givim trening tu long ol pablik seven o gavman woklain long foapela distrik bilong Rabaul, Kokopo, Pomio na Gazelle.

Moide i askim ol presiden bilong wan wan ol lokal level gavman (LLG) na ol wod kaunsila long helpim ol heltwoka na mekim awenes kempen bilong kisim banis sut.

Em i tok ol i putim 600 marasin long Butuwin haus marasin long Kokopo.

Em i tok ol bai givim dispela banis sut pastaim long ol heltwoka, polis, Koreksinel opisa na ol bosmanmeri bilong wan wan ol provinsal divisen.

“Mipela bai givim awenes pastaim bikos planti kain kain toktok i kamap olsem sapos ol manmeri i kisim dispela marasin bai bagarapim ol,” Moide i tok.

“Dispela marasin em bilong ol bikpela manmeri na i no bilong ol pikinini.

Moide i tok ol helt woklain i mas save pastaim long rot bilong givim marasin bipo long ol i ken givim.

Em i tok liklik taim ol bai tokaut long ol de bilong patrol na mekim ol awenes wok bilong givim dispela sut marasin.

Michael Novingu i raitim