“SAPOTIM ol lokal bisnis long givim sevis long ol pipel em i namba wan rot bilong kamapim win-win risal long olgeta stekholda,” Memba bilong Not Flai, James Donald i tok.

Not Flai Ilektret long Westen Provins em ples we bikpela main, OK Tedi gol na kopa main i stap na operet long en. Stat long 1980, Ok Tedi main i save kontribiut bikpela i go long ikonomi bilong Papua Niugini.

Olgeta de, ol pipel husat i stap sait long Ok Tedi na Strickland wara i save wasim gol na dispela i kamap wanpela ikonomik ektiviti bilong ol.

Bihain long em i bin luksave olsem ol lokal pipel i nidim gutpela maket bilong salim gol bilong ol, lokal bisnis man John Nakdaun i kamapim Ok Tedi Stones Limited (OTSL). Em i rejistaim kampani wantaim Invesmen  Promosen Atoriti (IPA) long Oktoba 19, 2020 na nau i operet olsem lokal kampani bilong baim gol.

Not Flai Distrik Divelopmen Atoriti (NFDDA) i wanbel long sapotim OTSL wantaim Distrik Sapot Gren (DSG) bilong em  long kamapim gutpela maket bilong ol lokal bihain long em i mekim ol wok painimaut bilong em long dispela wok.

Long namba wan tem bilong em, Memba Donald i bin go long Haidawogam ples long Kiunga-Tabubil na i givim K200, 000 we i kam long NFDDA DSG long OTSL long taim kampani i mekim opisal lonsing bilong em.

Siaman na Menesing Dairekta bilong OTSL, John Nakdaun i tok em i statim kampani wantaim driman bilong helpim ol lokal pipel long baim gol bilong ol.

Em i tok OTSL bai statim wok bilong em long dispela wik na bai baim gol long K136.00.

“Driman bilong kampani em long salim gol i go long narapela kantri long taim bihain. Fainensal helpim bilong NFDDA i kam long rait taim. Mipela bai stat liklik na bihain lukluk long sevim distrik na provins,” Nakdaun i tok.

Memba Donald i amamas tru long gutpela wok bilong OTSL na em i askim ol arapela SME long kamapim ol arapela bisnis tu bilong strongim ikonomi bilong Provins. Em i tok NFDDA i stap redi long helpim ol sapos ol SME i nidim helpim.