LINK PNG i mekim nupela plen bilong baim liklik sea long PNG Air balus bihain long PNG Independent Consumer and Competition Commission (ICCC) i bin tok nogat long namba wan askim bilong em long 6-pela mun i go pinis.

Astingting bilong wanem na ICCC i bin tok nogat long dispela em bikos long hevi we dispela muv bai putim long level bilong kompetisen o resis bilong tupela long domestik maket bilong kantri.

Long wanpela stetmen, Siaman bilong Link PNG, Kostas Constantinou wantaim patna bilong em long PNG Air, Augustine Mano  na seaholda bilong PNG Air, Mineral Recource Development Company Limited (MRDC) i tok, bikpela astingting bilong dispela muv em long helpim PNG Air i kamap independen balus we i ken kamap wantaim ol fea bilong em na i ken salim ol tiket bilong em yet sepret long Air Niugini.

Ol i tok, “Em i gutpela olsem PNG i mas gat tupela independen balus, PNG Air na Air Niugini, bai tupela i ken go het long gat strongpela resis namel long ol long domestik maket. COVID-19 i stap longpela taim nau na i givim hevi long tupela balus olsem na i gutpela tupela i operet long komesel level. Long wankain taim tu, ol balus i mas kisim dispela sans long daunim ol kost bilong ol.”      

Maski Link PNG bai gat liklik sea tasol, olgeta komesel wok bilong em bai stap sepret o em yet na independen long PNG Air.   

Long dispela taim, tupela balus i no tokaut klia yet long hau nupela tingting bilong ol i narakain long dispela we ICCC bin tok nogat long em long 2020.