WANPELA longtaim wokmeri bilong Agmark long Buka brens i kisim tok orait bilong pinis wok las wik.

Claire Toboen i wok wantaim Agmark long 23 krismas.  Em i bin traim hat tru long pinis wok tasol kampani i no bin tok orait long em.  Tasol long las wik, tok orait bilong Claire long pinis wok i kamap olsem em i bin laikim.

Las Fraide, menesmen na ol wokmanmeri bilong Agmark long Buka i bin holim liklik tok gutbai kaikai bilong Claire long tok amamas long ol gutpela wok em i bin mekim.

Wok bilong Claire wantaim Agmark i bin stat long Me 1998 olsem klak. Las wik Claire i lusim wok olsem Brens Menesa bilong Agmark long Kokopau.

Long taim em i wok wantaim Agmark, Claire i bin hat tru inap em kisim ol bikpela posisen na em i bin het bilong tripela divisen. Em Kakao, Siping na Didiman Stoa.

“Mi bin lukautim tim i gat 30 wokmanmeri, planti bilong ol em ol man. Mi bin bungim planti salens tasol mi sanap strong long kamapim driman bilong mi long helpim ol bisnis long gro na kamap strong maski mi bin bungim ol salens we i bin kamap bihain long kraisis,” Claire i tok.

Em i tok em i amamas long lusim wok na givim sans long ol arapela husat i ken mekim wok em i lusim.

“Mi strongim yupela long stap na komitim yupela long kampani, go hetim wok mi lusim na mekim rot bilong yupela i go antap. Nau mi laik malolo na mekim ol arapela wok bilong mi,” em i tok.

Long taim bilong gutbai kaikai bilong Claire, Salome Rihatta wan wok bilong Claire i tok Claire em gutpela rol model bilong ol meri long ol menesmen posisen long Bogenvil  insait long kampani.

Long makim tok amamas bilong kampani, Claire i kisim setifiket long luksave bilong wok bilong em insait long 23 krismas em i wok.

Alex Munme i raitim