GAVANA bilong Morobe, Ginson Saonu i bin tokaut olsem Morobe Provinsal Gavman (MPG) i strongim ol rurel lain bilong Wau-Bulolo husat i mekim aluvial maining o maining bilong wesan, graun o ol arapela samting we wara i karim  na lusim long hap we wara i no ran strong.

Dispela toktok i kamap bihain long miting na diskasen i bin kamap namel long 4-pela lain husat i serim Wau, Bulolo na Watut wara long Bulolo distrik.

Gavana Saonu i tok Morobe Provinsal Gavman i givim tok orait long Albatross Intergrated Limited husat i bin wok longpela taim wantaim ol aluvial maina na ol arapela maining projek long Nu Ailan Provins.

“Dispela em nupela tingting we MPG i karimaut long kamapim gut maining long Morobe. Mi makim Tutumang Komiti Siaman bilong Maining bai wok klostu wantaim ol aluvial maina, papagraun, maina asosiesen na ol kopretiv sosaiti long stiaim wok bai go gut. Olgeta ripot bai go long PEC long wok bilong ol aluvial maina.” Mista Saonu i tok.

“Mi save olsem long ol taim i go pinis, ol papagraun na ol lain i mekim liklik maining long taim bipo long Wau i no bin kisim gutpela samting olsem pe bilong gol bilong ol, olsem na em i taim nau MPG i helpim ol long kisim bek gutpela pe long aluvial gol,” em i tok.

Em i tok moa olsem ol plen bilong tanim aluvial gol we ol papagraun i kisim i go long gol bai stap pinis. Dispela em bilong helpim ol long gat fainensal sekyuriti na gutpela sindaun long taim bihain bilong ol.

Regulatory Operation Division (ROD) bilong Mineral Risos Atoriti na Albatross Intergrated Limited bai wokbung wantaim ol papagraun na ol lain i serim eria bilong maining long stiaim wok bai go gut long taim bilong aluvial maining.

Gavana Saonu i tok olgeta aluvial maina bilong Wau Bulolo bai kisim fainensal litresi trening bilong helpim ol long save long lukautim mani bilong ol.

“Aluvial maining bai kamap wanpela gutpela sans bilong Morobe long mekim moa mani bilong strongim ikonomi bilong en.” Mista Saonu i tok.