BSP Fainensal Grup Limited i bin tokaut olsem em i daunim ol sevis sas bilong Mobail Benking, Isipay Top-ap na long yusim EFTPoS long kisim mani long 50 pesen.

Stat long Fraide, 30 Epril 2021, ol kastoma i ken yusim Benking Isipay top-ap na EFTPoS long daunbilo sas. Sas bilong Benking Isipay Top-ap nau em i suruk long 50 toea i go daun long 25 toea na sas bilong yusim EFTPos long kisim mani em i suruk long K4.00 i go long K2.00.

Astingting bilong dispela senis em long helpim na pulim planti kastoma long yusim dijital benking we i save kamapim gutpela na isi rot bilong kisim ol sevis bilong BSP.

“BSP i no bin apim ol sas bilong em stat long 2014 tasol em i bin wok long daunim planti ol sas bilong em long ol sevis bilong em long ol taim i go pinis,”Sif Ekseketiv Opisa bilong BSP Fainensal Grup Limited, Robin Flemming i tok.

Mista Fleming i tok moa olsem long ol taim i go pinis BSP i mekim K50 milien long ol sas bilong ol sevis bilong en long wanpela yia. Em i tok benk i mekim disisen bilong em long no ken apim ol sas bilong ol sevis bilong em bikos benk i laik givim ol kastoma prodak na sevis we i ken inapim laik bilong ol.

Long wankain taim BSP Grup Menesa Ritel, Daniel Faunt i tok tu olsem “long dispela taim i gat narapela benk long kantri i tok em i wok long givim ol fri akaun. BSP tu i gat fri Kundu akaun bilong em we i bin kamap long 2012 na i stap yet tude.”

Em i tok Kundu akaun i no save kisim sas bilong wan wan mun tasol em i sasim tasol ol trenseksen we i kamap long dispela akaun. Ol kastoma i ken eksesim moa sevis long dispela akaun long K9.50 tasol long wanpela mun.

BSP bai go het yet long mekim benking i kamap isi na seif long ol kastoma bilong en.

Carolyne Ketsimur i raitim