OL teknikol tim bilong Fresh Produce Development Agency (FPDA) i go wok kirapim tingting bilong growim potato na raun anian insait long Korokowa hauslain, Dom eria bilong Gumine distrik, Simbu provins long las wik.

Dispela ol lain bilong FPDA i gat strongpela tingting na i no pret long i go long Korokowa we i bin i gat bikpela birua namel long ol komyuniti long 2017 bihain tasol long nesenel ileksen.

Korokowa viles i stap insait long Not Wes kona bilong Dom eria, wod 3 bilong Digine Lokal Level Gavman na i gat nem olsem ‘no-go’ eria long ol pasin birua i bin kamap bihain long ileksen.

Dispela birua namel long ol lain wanpisin i mekim na i no gat wok bisnis i kamap na ol pipel i stap tarangu.

Long dispela ples em ol lain FPDA i go na mekim kamap wok fama awenes bilong raun anian long las wik Trinde.

Tim bilong FPDA wantiam lida bilong ol David Kaupa i bin i go wantaim strongpela tingting long kamapim raun anian model fam. FPDA i bringim wantaim ol tul bilong wok long gaden, marasin, na sid bilong raun anian.

FPDA teknikol tim i trenim ol manmeri bilong wod 3, 4, 5, na 6 long dispela LLG long wok bilong raun anian.

Bihain long em i lukim sindaun long ples Mista David Kaupa i tok olsem 2017 nesenel ileksen i kamapim bikpela hevi long Korokowa na bagarapim tru sindaun long ples.

“Mipela i lukim ol mama i fidim ol famili bilong ol wantaim kaukau na tapiok ol i growim. Sampela bilong ol dispela kaikai ol i salim long maket na kisim klostu long K10 na K20. I no gat narapela rot bilong mekim wok bisnis insait long dispela ples,” Mista Kaupa i tok.

Em i tok taim FPDA i go insait long Korokowa ol komyuniti lida ol i kam na tok olsem nau ol manmeri na yangpela i ken wok fama na stopim pasin birua ol i wok long kamapim.

Em i tok ol manmeri i laik kamapim wok bung wantaim FPDA na i kamapim wok bisnis long wok fama wantaim raun anian na potato.

Mista Kaupa i tok FPDA i kamapim pinis wanpela raun anian model fam long Korokowa long las wik na bihain FPDA i ken kamapim potato fam wantaim.

“FPDA i tok strong long ol yangpela manmeri long wok fama long graun bilong ol yet. Em wanpela we bilong kamapim gut mani long wok fama.”

Mista Kaupa i tok FPDA i gat tingting pinis long kirapim wok fama insait long olgeta wod bilong Digine LLG wantaim husat manmeri i gat tingting long kamapim bisnis long wok fama.

“Poteto and raun anian model fam i bin kamap pinis long Gumine LLG na mipela i lukim gutpela mak pinis. Olsem na mipela i laik surukim wok i go long Digine na Kumai-Bomai LLG wantaim.”

Dispela wok bung wantaim FPDA na Gumine distrik em memba bilong Gumine Nick Kuman i kamapim na wok bung i stat long mun Septemba bilong las yia.

Aninit long wanpela Memorandum bilong Agrimen (MOA), Nick Kuman i givim mani long FPDA long givim husat fama i gat tingting long wok bilong raun anian na poteto wantaim sid, ol tul, marasin, na ol samting bilong wokim neseri.

FPDA aninit long MoA i givim trening, na givim sapot sevis long ol fama long kamapim gutpela kwaliti potato na raun anian.

Nau yet i gat 10-pela poteto model fam insait long Gumine LLG. Ol fama i kamapim 7.7 tan poteto long mun i go pinis.  Ol fam i kamapim tu 7.7 tan poteto sid long 3 tan poteto sid ol i bin kisim long FPDA long las yia.

 Ennio Kuble i raitim