NESENELK Divelopmen Benk (NDB) i redi nau long givim aut ol dinau mani long ol MSME na SME. Last wik Bod Siaman Michael Yake i tok K80 milien bilong MSME na SME i redi nau long rolaut long NDB.

 Rolaut long Atonomus Rijon bilong Bogenvil i stat pinis.

Mista Yake i tok  ol lain i gat intres long ranim MSME na SME wantaim ol lain husat i gat MSME na SME bisnis pinis long go long NDB klostu long ol na long Waigani Het Opis na askim long helpim.

 NDB i bin lukautim dispela K80 milien gut na nau i redi long givim aut.

“Ol skul liva long gred wan long Koles na Yunivesiti greduet, ol mama husat i no gat man, ol papa husat i no gat meri, ol lain husat ol man na meri bilong ol i wok long pablik sevis, ol praivet sekta na NGO, ol lain i stap long setelmen, ples na Ailan. Dispela em sans bilong yupela long statim bisnis bilong yupela yet long PNG. Long ol lain husat i gat pinis ol bisnis bilong ol, NDB bai sapotim yupela tu long groim bisnis bilong yupela i go long narapela level.” Mista Yake i tok.

Marape-Basil Gavman i givim olgeta pipel bilong Papua Niugini dispela bikpela sans long kamapim bisnis bilong ol yet.

Long taim bihain, ol dispela bisnis lain i ken kamap patna wantaim gavman bilong PNG na kontribiut i go long divelopmen bilong PNG. Komitmen bilong gavman long givim K1 bilien i go long ol MSME na SME sekta long 5-pela yia i kam wantaim dispela yia em i bikpela blesing na senis long PNG.

NDB i surukim han bilong em i go long ol hap we i no save gat ekses long sevis em wanpela bikpela risk tru long ol benk. Tasol NDB i gat strongpela Bod bilong lukautim ol hevi we i bai kamap.

“Nau em i gutpela taim long kisim dispela sans long MSME na SME. Dispela em samting we yu mas noken misim” Mista Yake i tok.

 Long 5-pela yia K500 milien bai stap long han bilong NDB na narapela K500 milien bai stap long BSP long nem bilong MSME na SME tasol. Praim Minista James Marape i mekim komitmen bilong em i kamap tru taim em i putim namba wan K200 milien. K100 milien long BSP na K80 milien long NDB (K20 milien long Komes na Indastri). Dispela bai statim wok bilong MSME na SME long namba tri kwata bilong 2020.

Olgeta kam na visitim NDB Opis klostu long yu insait long kantri na kisim helpim. Sans bilong yu i stat nau.