Smol na Midium Entaprais (SME) we i gat gutpela histori, gat kontrak wantaim Intenal Revenyu Komisin (IRC) na Invesmen Promosen Atoriti (IPA) na save baim takis stret bai inap long kisim dispela plen ikonomik pasel aninit long Marape- Basil gavman, Deputi Praim Minista Sam Basil i tok.

Las wik Trinde 21 Epril, Minista bilong Komes na Indastri (DCI) na Deputi Praim Minista Samuel. H. Basil i mekim wanpela midia stetmen long lukluk bek long kraiteria bilong givim aut K200 milien bilong ol SME.

Mista Basil i tok, “Mi laik stopim fanding bilong ol nau tasol kirap nogut SME husat no save baim takis long wanem ol i no save stap longpela taim na planti taim mipela i save rausim dinau bilong ol.”

Wantaim sapot bilong IRC Jeneral Komisina Sam Koim na IPA Menesing Dairekta, Clarence Hoot, Mista Basil tok long DCI, IPA na SME Koporesen long wok bung wantaim long painimaut na luksave long ol SME i save baim takis gut na tu takis ol i baim hau i save helpim COVID-19, we ol dispela SME i stap insait long PNG na ol i kisim helpim long BSP, NDB o DCI.

Mista Basil i tok olsem, 100 pesen IRC takis komplaiens bilong SME long PNG bai kisim kam gutpela sapot bilong ol dinau na grants wantaim wan wan yia ripot long taim stret i go long IPA long rejistresen bilong ol SME long bihaintaim.

“Bihain long ol senis i kamap, mi tingting long kisim wanpela NEC pepa we bai givim gutpela, moa stret na ikwal wei long givim auto l dinau,” Mista Basil i tok.

Basil tok moa olsem, em i bikpela samting tru long wanem senis bai kamap na astingting bilong givim aut dispela dinau bai i no lukluk long COVID-19 tasol. Ol bai i lukluk tu long ol lain husat wok strong yet long bildim kantri.

Mista Basil i tok em i amamas, long bihain dispela samting bai sapotim ol PNG Femili bisnis husat i wok hat ns operet long dispela kain wei insait long IRC, na baim takis long taim na bihainim stretpela proses bilong bisnis.

Koim tu i amamas long dispela nupela lukluk bilong gavman, em i tok, dispela K200 milien em mani bilong ol pipel i baim takis na ol SME husat i wok het long baim takis, olsem na ol bai kisim helpim long dispela taim bilong hevi.

“Gavman sabsidi bai no inap go long ol lain i no save bihainim ol lo bilong bisnis na takis em namba wan samting,” Koim i tok moa.

 Basil i tok olsem long wetim konsen bilong gutpela rol out bilong SME Polisi na fandim, ol i mekim stret olsem ol hatwok manmeri helpim SME’s insait long PNG i stap gut, fe na stretpela.

Penelope Aimari i raitim