MOROBE Gavana Ginson Saonu I laikim wankain dil olsem Porgera long Wafi-Golpu maining projek.

Em i tok olsem Porgera dil we i givim 51 pesen onasip long gavman na pipel em i gutpela nius.

“Mi bilip mipela bai i gat wanpela gutpela dil tru i kam aut long Wafi-Golpu.

“Yumi lainim pinis na i gat planti moa samting long mekim olsem kantri na bilong gavman bilong yumi aninit long lidasip bilong Praim Minista James Marape na Pangu Pati. Em bilong yumi long papa tru long ol risos projek bilong yumi na wok hat long kamap long mak bilong ikonomik independens,” Gavana Saonu i tok.

Em i laikim Morobe long go pas na em i lukim Wafi-Golpu olsem wanpela rot bilong mekim dispela tingting i kamap ples klia na surukim Morobe i go long narapela mak. Dispela bai i kamapim moa bisnis na ikonomik benefit.

Wantaim dispela ol senis long Porgera, Gavana Saonu i tok Morobe gavman i stap long arere nau long stretim ol analisis na polisi pepa bilong en na ol bai i presentim long nesenel gavman long dispela mun.

Em i tok dispela em long redi long ol toktok long ol maining prodaksen ol bai i holim na tu long ol benefit long provins na ol papagraun.

“Mipela i sanap strong long tingting olsem olgeta stekolda mas benefit gut,” em i tok.

Ol stekolda em divelopa bilong Wafi-Golpu projek, Nesenel Gavman na Morobe Gavman.

“Dispela Wafi-Golpu main em i bikpela main long rijon na em i impoten olgeta pati i amamas long muv wantaim projek.

Em i tok moa olsem sanap bilong em na gavman bilong Morobe long Deep Sea Tailings Placements (DSTP) sistem i no senis. Ol i tok nogat long putim ol pipia bilong maining long solwara na i laikim kampani long painim narapela rot long rausim ol pipia bilong en.