WANPELA strit sela Stanley Apma bilong ples Wom long Angoram Distrik insait long Is Sepik Provins, i save salim Sepik fres kiau bilong kakaruk long Wewak taun olgeta de i tok dispela em gutpela kiau we i gat teist.

Mista Apma tok olsem em i save salim long K1 tasol na planti manmeri na pikinini save baim. Long wanpela de em i save mekim K300.

Ol kiau sela long Wewak i save go stret long ol stua long taun we i salim ol kiau ya na baim. Dispela ol kiau em i kam stret long Huaropmo kakaruk fam long Yangoru Sausia Distrik, Is Sepik Provins.

Em i tok moa olsem ol strit sela nau i salim kiau long olgeta hap olsem Maprik na arere long Sepik Haiwe yet.

Mista Apma i tok Sepik Fres em i namba wan na olgeta manmeri mas baim tasol dispela kiau. Long strit kiau i boil pinis em K1 tasol na em i kam long graun bilong yumi stret.

Jonathan Poema i raitim