OL 32 patisipen (3-pela mama, 12-pela yangpela meri, 14 yangpela man na 3-pela papa) i bin kisim trening bilong kakao, vanilla na pis faming long Wewak distrik aninit long tim “Menstriming Jenda insait long Egri-fud veliu sein”.

Woksap i bin kamap long Tunde 20 i go long Fonde 22 Epril 2021 long Sepik Senta ov Hope long Wewak taun.

Dispela EU-STREIT Program i bin kamap aninit long lidasip bilong Food and Agriculture Organisation (FAO). Ol i wok klostu wantaim Gavman bilong PNG na ol lokal patna long strongim ol lokal bisnis lain bilong egrikalsa.

Planti taim pasin bilong kros na pait namel long ol famili i save kamapim hevi na daunim ikonomik pawa na jenda balens long taim bilong mekim disisen insait long famili long LLG, Distrik na Provinsal level.

Long stretim dispela hevi, ol patisipen i bin kisim skul long ol jenda toktok, jenda awenes, ol skul bilong skelim dispela hevi na impruvim long kamapim gut egri-veliu sen, egr- bisnis grup na egri- kopretiv grup bilong kakao, vanila na fiseris insait long ol komyuniti.

“Mipela i kam toktok long rot bilong mekim bisnis olsem wanpela famili. Dispela trening yupela kisim em bilong helpim yupela long save gut long veliu bilong famili. Wokbung wantaim olsem famili em i ki bilong win na kamap gutpela bisnis manmeri long egrikalsa,” Patu Shang, Intenesenel Jenda Yut Speselis bilong Program i tok.

Ol patisipen i kisim tu trening bilong fainensel literesi bilong helpim ol long save long rot bilong basetim mani bilong ol. Ol patisipen i bin amamas tru long kisim dispela trening na ol i serim ol tingting bilong ol.

Wanpela patisipen, Jayleen Wimari bilong Uridogung i tok, “Driman bilong mi em long muv nau i go long narapela level. Mi laik mekim senis bihainim skul mi kisim. Trening i givim mi strongpela tingting long kamap gutpela bisnis meri insait long komyuniti.

Jayleen na man bilong em i gat 200x400 mita kakao long ples bilong ol.

Wanpela astingting bilong dispela trening em long helpim ol fama long andasten olsem ol meri wantaim sapot bilong ol man bilong ol na yut i ken wokbung wantaim olsem famili long kamapim gutpela sastenabol veliu sen divelopmen.