NU Briten Palm Oil Limited (NBPOL) husat i bin rejista aninit long Nu Briten Palm Oil Faundesen (NBPOF) i bin mekim komitmen las yia long donetim COVID-19 Tes Kit long olgeta 6-pela provins we NBPOL i save operet long en.

Taim namba bilong COVID-19 i go antap tru NBPOF i bin givim mani gen long paitim COVID-19 long kantri wantaim saplai bilong GeneXpert long olgeta hap bilong kantri na yusim ol RDT long olgeta Helt Fesiliti long taim bilong hevi na daunim COVID-19 long PNG.

Mak bilong 9,000 tes kit bilong Panbio COVID-19-Ag RDT ol i bin baim long veliu bilong K286,200 na donetim long 6-pela Provinsal Helt Atoriti; Madang, Milen Bey, Morobe, Nu Ailan, Oro na Wes Nu Briten Provins. Na wan wan Provinsal Helt Atoriti kisim 1,500 tes kit.

Sif Ekseketiv Opisa bilong NBPOL  Mohd Adan Shah Mohd Zain i makim 1,500 tes kit long WNB Provinsal Helt Atoriti long las wik Fonde na i tok olsem NBPOL i tingim ol pipel insait long 6-pela provins operesen na bin go aut long baim ol tes kit bilong ol komyuniti.

Jacklyn Kimala i raitim