I kam long buk “Be inspired” Papa Sam i raitim long Inglis na Carolyne Ketsimur i tanim long tok pisin.

LONG dispela isiu, bai yumi kisim skul long hau tingting bilong man na meri i wok long kain kain level.

Bikos long kalsa, gavman, sios na edukesin sistem bilong yumi long PNG, ol manmeri na pikinini i save tren long harim tok bilong atoriti na bihainim. Ol pipel i no save kamap responsibol, ol i no save kisim risk, ol i no krietiv. Ol i wait tasol long kisim oda na ekt.

O yumi ken tok yumi kisim trening long harim instraksen o toktok bilong ol arapela, lukim ol edvetismen, midia, tingting bilong ol arapela na yumi bihainim tasol.

Bikos long dispela, edvetismen i save win. Ol pipel i lukim tasol na hariap tru long baim samting i stap long daun prais, maski ol i no nidim dispela samting.

Ol manmeri i win long laip na kamap saksesful i no save bihainim kwiktaim. Ol i gat tingting bilong ol yet. Ol i save mekim wok painimaut, skelim gut olgeta rot, kamap wantaim disisen na bihain ekt.

Ol bisnis klas pipel em ol kepten bilong sip bilong ol yet. Ol i harim infomesin na skelim tingting bilong ol arapela tasol ol i tingting long wanem samting i gutpela long laip bilong ol. Ol i no save bihainim laik bilong ol arapela na ol i no save sutim tok long ol arapela taim ol i mekim samting i rong.

Ol turangu lain i save wet long samting i kam long ol. Ol i wetim instraksin i kam long atoriti. Dispela i kamap bikos yumi larim ol arapela i kontrolim yumi na yumi lusim konfiden long yumi yet. Long dispela tasol na yumi bai i no inap suruk i go fowot long laip.

I no gutpela long bringim dispela kain tingting i go insait long bisnis. Planti bisnis i no save kamap gut bikos long negetiv tingting. Negetiv tingting i save kamapim;

• Hevi na wok i no save pinis gut
• No gat inap mani long bisnis
• Daunim spirit bilong ol manmeri
• Kraisis
• Les pasin na go bek beksait na hat long go fowat

Ol edvens manmeri i no save wetim ol arapela. Ol i go het long mekim wok bilong ol na putim moa veliu long wok inap wok i pinis. Positiv tingting bilong ol i save pulim olgeta gutpela samting i kam long laip bilong ol.

Long kamap edvens manmeri, yu mas trenim yu yet na stat tamblo na wok isi isi i kam antap. Mekim dispela i kamap hebit bilong yu na bai yu lukim bikpela senis i kamap long laip bilong yu.

KAMAP VAIABOL NA PUTIM VELIU LONG OLGETA SAMTING NA LONG OLGETA PIPEL LONG OLGETA DE.