EU- STREIT PNG wantaim Faundesin ov Women in Egrikalsa Divelopmen (FOWIAD) kopret sosaiti i bin opim namba wan distribiusen bilong 6150 sid kakao i go long 123 fama long Is Sepik Provins.

Dispela wok bung wantaim bilong tupela i kamap bihain long Fud na Egrikalsa ogenaisesin (FAO) husat i wok aninit long EU- STREIT PNG na FOWIAD, wanpela NGO grup bilong ol meri na yut i bin sainim agrimen long Februeri 17, 2021.

FOWIAD i save sapotim moa long 2, 000 meri na yut we sampela bilong ol man i dai pini na i no marit. Dispela em bilong helpim ol long go insait long egrikalsa bilong sapotim ol na famili bilong ol.

Long ol lain husat i bin kisim ol sid kakao, 29 em ol meri na 94 em ol man. Ol i kam long Jambitangit na Lingu ples long Not Wosera LLG.

“Mipela i laik tok tenkyu long FOWIAD long bringim FAO long sapotim mipela wantaim dispela projek,” Wanpela wod memba na fama, Smith Takura husat i makim ol kakao fama long Maprik i tok.

“Dispela program bai helpim yupla long kisim egrikalsa olsem bisnis na wok hat long mekim i kamap gut bilong helpim yupela na ol famili bilong yupela,” Deputi Kodineta bilong EU- STREIT PNG Dokta Pavel Burian i tok.

Dispela projek i lukluk long helpim olgeta pipel na no gat wanpela i mas i stap beksait. Olsem na ol i makim wanpela memba insait long wanpela haus long kisim sid, go mekim i kamap planti na serim i go long arapela haus lain.

Ol dispela kakao sid ol i badim na em i ken paitim bora dispela binatang nogut i save kaikai na bagarapim ol kakao sid.

Planti taim ol meri na yut i no save kisim sans long ol egrikalsa projek.

“Yumi mas no ken lusim tingting long ol meri na yut bilong yumi. Yumi mas wokbung wantaim ol o putim ol i go pas na larim ol man i pusim ol long wok hat na kontribiut insait long famili. Bikos FAO na EU i laik bai dispela projek i helpim olgeta wan wan manmeri insait long famili,” Intenesenel Jenda na Yut inklusen speselis, Patu Shang i tok.

Long dispela taim, moa long 10, 000 fama i kisim 43, 355 sid kakao pinis. Insait long dispela 43, 355, 15, 712 kakao bod i skelim skelim, 21, 493 EU-STREIT i skelim na 6150 FOWIAD i skelim.