AIR Niugini i redi long helpim Nesenel Gavman long karim  COVID-19 veksin fri i go long olgeta Provins insait long PNG.

Balus PX 393 i bin kam long Singapore las wik i karim 123, 000 dos bilong COVID-19 veksin.

Long dispela taim bilong COVID-19, Air Niugini i bin amamas  long helpim na givim sevis insait na ausait long kantri. Sevis bilong Air Niugini i helpim gavman long karim ol medikol saplai, swab tes, PPE na ol medikol profesenal wantaim ol kago na pasindia.

Jenerel Menesa, Komesel Sevis bilong Air Niugini, Dominic Kaumu i tok, “Air Niugini bai helpim Nesenel Gavman long karim ol veksin wantaim nogat sas bilong en, na bringim i go long olgeta Provins.”

Em i tok Air Niugini bai go het long sapotim PNG long daunim hevi bilong COVID-19.

Long wankain taim, Air Niugini i sanap strong long lukautim ol wokmanmeri bilong en na givim ol PPE bilong ol long werim long taim ol i stap long wok ples. Na wankain tu long ol pasindia i laik kalap long balus.