OGENAISESIN Fres Produse Divelopmen Ejensi, (FPDA) i surukim wok bilong kamapim gutpela kaukau bilong salim i go insait long Lufa distrik insait long Isten Hailans long las wik.

Dispela wok i kamap bihain long FPDA i mekim wok pinis long ol narapela distrik bilong Hailans rijon olsem wanpela rot bilong kamapim mani  bilong famili na hauslain.

Bihain long FPDA i mekim planti wok bilong kamapim gutpela sid kaukau bilong planim na salim namel long ol growa ol wokman bilong FPDA i karim dispela wok i go moa yet long Lufa distrik.

Lufa distrik i stap long boda bilong Simbu na i stap namel long Mt Elimbari long Chuave distrik na Mt Michael long Isten Hailans.

Man i go pas long kamapim sid kaukau, David Kaupa i tok astingting bilong groim sid kaukau bilong skelim namel long ol fama em long kamapim gutpela na klinpela kaukau i gat kwaliti.

Mista Kaupa i tok  ol sid kaukau ol fama i groim ol i ken salim i go long ol narapela fama insait long Isten Hailans long bihaintaim.

Mista Kaupa i tok Lufa distrik  i ken groim kaukau  longpela taim na kamapim wok bisnis long bihain.

Em i tok ol manmeri long Lufa i amamas long kisim wanpela FPDA wokman we bai i givim sapot long wok bilong FPDA na kamapim wok kaukau long graun bilong ol.

“Inap long FPDA long wok strong wantaim ol fama long wok kaukau olsem bisnis, ol fama i mas luksave long tupelo bikpela samting. Dispela tupela samting em; ol fama i mas kisim klinpela sid kaukau we FPDA i gat luksave long en, na namba tu ol fama i mas kisim trening long nupela rot bilong groim  ol dispela nupela potato,” Mista Kaupa i tok.

Em i tok ol wokman bilong FPDA bai kamapim trening bihain taim long ol i luksave long ol kaukau fama insait long Lufa.

FPDA wok man i go kamap na stap wantaim ol manmeri bilong Ret Top ples, wod 8 bilong Mt Michael lokal level gavman long las wik.

ENNIO KUBLE bilong WRight Media long Simbu i raitim,