LAS wik,PNG COVID-19  Nesenel Pendemik Respons i kisim bikpela helpim i kam long PNG LNG Projek.

PNG LNG Projek i givim 10-pela nupela kar bilong sapotim Nesenel Kontrol Senta long pait bilong daunim COVID-19 insait long Nesenel Kepitol Distrik.

Long taim em i kisim ol kar long Menesing Dairekta bilong ExxonMobil, Andrew Barry, Polis Komisina na Kontrola bilong PNG COVID-19 Nesenel Pendemik Respons, David Manning i tok ol dispela kar bai helpim gut tru PNG Gavman long banisim spred bilong COVID-19.

“Tupela 25 sita bas, 6-pela liklik ven na tupela stesin vegon bai sapotim COVID-19 senta long raun na mekim kontek tresing, givim awenes, karim ol PPE na tes sempol,” Mista Manning i tok.

Em i tok dispela donesin i kam long dispela taim we mipela i nidim helpim bilong banisim dispela sik nogut long kalap kalap.

“Mipela i amamas na tok tenkyu tru long ExxonMobil long bikpela luksave bilong ol long helpim mipela long paitim dispela sik. Mi bilip olsem yumi ken kontrolim COVID-19 sapos olgeta pipel i kisim veksin,” Manning i tok.

Menesing Dairekta bilong ExxonMobil, Andrew Barry i tok olsem opereta bilong PNG LNG Projek, kampani i amamas long sapotim wok bilong Nesenel Kontrol Senta long daunim COVID-19.

“Patnasip bilong kampani na gavman i mas strong long dispela taim long helpim kantri daunim dispela sik nogut. Mipela bai go het long sapotim gavman long wanem rot mipela i ken mekim,” Mista Barry i tok.

Long 2020, ExxonMobil i bin gvim ol PPE long ol provinsal helt atoriti long Hela na Sentral Provins na long wankain taim I givim awanes long ol pipel long ol rot bilong lukautim ol yet long kisim COVID-19.

Long Nesenel level, ExxonMobil i bin sapotim Nesenel Dipatmen bilong Helt (NDoH) na COVID-19 Nesenel Kontrol Senta wantaim ol medikol ikwipmen na kaikai long Pot Mosbi Jenerel haus sik.

Carolyne Ketsimur i raitim