Ok Tedi Maining Limited (OTML) i statim maining operesen bilong em pinis long Fonde, 1 Epril 2021.

OTML i bin saapendim ol operesen bilong em long 19^th Mas bihain long ol i bin painim aut olsem sik COVID-19 i bin inkris long maining eria.

Ekting Menesing Dairekta na Sif Ekseketiv Opisa Kedi Ilimbit i toksave long operesen bai stat i go inap long ful operesen bihain long tupela wik.

Mista Ilimbit i tok liklik taim saspensen bilong operesen i mekim kampani i salim sampela ol woka husat i no save stap long maining eria i go bek long famili bilong ol na tambuim muvmen bilong ol pipel na mekim bikpela tes we i lukim olsem moa long 10, 000 sempel ol i bin kisim long ol wokfos na taun residen na salim i go long labotari long Pot Mosbi na Australia.

Em i tok planti bilong ol positiv keis ol i bin rekotim long tes ol i bin kisim marasin na orait o Nesenel Dipatmen bilong Helt na World Health Organisation (WHO) testim na tok orait long ol i mas bihainim sosol distens protokol.

“Sefti, helt na stap gut bilong wokfos, ol komyuniti, bisnis patna na sapot sevis woka bai kamap namba wan praioriti bilong mipela.

“Saspensen bilong operesen i bin kamap liklik taim tasol long givim taim long ol medikol tim long testim ol pipel na em i gutpela long stat gen long taim,” Mista Ilimbit i tok.

“Tasol bikpela fokas nau em long statim operesen gut na lukim olsem mipela ken menesim COVID-19 kontrol mesa. Ol medikol tim wantaim husat ol lain i bin helpim dispela testing wok i bin mekim gutpela wok long stopim spred bilong varies long lukautim husat ol pipel, ol i bin testim positiv long COVID-19,” em i tok.

Maski, i bin i gat liklik taim saspensen bilong operesen, Mista Ilimbit i tok olsem kampani bai inap mekim winmani long dispela yia.

Long wankain taim, Memba bilong Kompiam-Ambum Sir John Pundari i askim OTML menesmen long tingim sefti bilong ol woka na ol komyuniti i stap klostu long maining eria pastaim long taim bilong operesen.

Em i tok tingim COVID-19 sefti mesa protokol na prektisim long taim bilong operesen bikos laip bilong ol pipel em i impoten long divelopmen bilong kantri na ol famili bilong ol.

Joseph Dawai i raitim