BENK bilong Saut Pasifik bai mekim wanpela nupela benk lo Eriku long helpim narapela tupela benk bilong en, top taun na Maket brens long wanem, planti pipel tru i mekim benking wantaim ol na tupela benk tasol i no inap.

Long pinis bilong mun Februeri, Robin Flemming Sif boS bilong BSP, i toksave olsem bai i gat nupela benk long Eriku bikos long bikplea namba bilong ol man i mekim bisnis wantaim BSP long Lae.

Dispela nupela benk bai kisim ples bilong olpela Pelgens supa maket long Eriku we nau em i wanpela Stua bilong Asia i stap.

Plening bilong developmen bilong benk i kamap pinis na BSP i wetim tasol tok orait bai kam long Fisikal Plening na Bilding Bod long go het na kirapim wok long dispela nupela brens bilong Lae.

 Mista Flemming i tok, “Ating long pinis bilong dispela yia bai mipela i pinisim dispela nupela benk na bai mipela i opim.

“Lae em i bikpela taun we pipel bilong olgeta hap bilong PNG i stap long en, olsem na dispela nupela benk bai mekim isi na helpim tru ol pipel bilong Lae,” Flemming i tok.

Long wankain taim BSP i givim sans bilong wok long ol manmeri bilong Lae taim em i surukim wok bilong BSP laip tim i go long Lae.

BSP i surukim wok i go yet tu na introdusim narapela samting nau yet long Lae olsem ol pipel i ken baim fiul na petrol wantaim mobail benking.

Narapela gutpela nupela sevis BSP i introdusim em eGiving. Em bilong ol Kristen long yusim websait bilong sios bilong ol long putim taits i go stret long benk akaun bilong sios. Dispela bai i mekim isi long ol pipel husat i no inap go long ol sios bikos long COVID-19.

Man i go pas long dispela wok bilong teknoloji long BSP Nuni Kuku i tok,“Ol Seven De Adventis sios long PNG em ol namba wan sios long insait long dispela eGiving sevis.”

Mista Flemming i tok olsem, BSP i mekim yet ol gutpela wok olsem mekim gut moa sevis bilong en long ol arapela benk bilong en insait long PNG long mekim bisnis wok bilong ol pipel i wokim benking wantaim BSP moa isi, kwiktaim na coronavirus fri.

Penelope Aimari i raitim