NATIONAL Superannuation Fund (NASFUND) i welkamim toksave bilong gavman long opim bek Porgera Main long Enga provins.

Long taim em i bin mekim toksave long dispela, Praim Minista James Marape i bin tokaut olsem operesin bilong Porgera Main bai op ben gen.

Sif Ekseketiv Opisa bilong Nasfund, Ian Tarutia i tok disisen bilong gavman long wokbung wantaim Barrick Niugini Ltd i soim gutpela sain long taim bihain bilong main na ol wokmanmeri bilong en.

“Long taim main i bin pas long Epril 2020, planti wok manmeri i bin kisim taim. Nasfund i bin mekim hap bilong em long helpim ol memba husat i gat sevings long kisim mani bilong lukautim ol famili bilong ol,” Mista Tarutia i tok.

Em i bin mekim tok klia tu olsem, supaenuesin em bilong kisim taim yu pinis long wok, i no long taim yu stap yet long wok.

Mista Tarutia i tok dispela disisen bilong opim Progera bai strongim ol investa long inves long ikonomi bilong PNG na tu kamapim planti wok long planti manmeri.

Nasfund i sevim planti kampani, ol wokmanmeri na ol kontrakta long Porgera na mipela i amamas long lukim Porgera main i redi long statim operesen bilong en.

“Mipela i redi long welkamim na sevim gen long ol memba long taim Porgera i statim operesen. Nasfund em i patna bilong yu long redim taim bihain bilong yu, taim yu pinis long wok.” Mista Tarutia i tok.

 Carolyne Ketsimur i raitim