Intenel Reveniu Komisina Sam Koim i no amamas long sosol midia long pablisim infomesen i no tru long wok bilong supaenuesen takis.

Long wanpela nupela nius riliis, Mista Koim i tok klia olsem dispela em ol giaman nius tasol.

“I bin i gat sampela midia atikol i bin kirapim isu bilong takis bilong supaenuesen i tok olsem ol kontribiuta bilong Nasfund na Nambawan Supa bai baim takis long sevings bilong ol, em i no tru.

“Taim dispela isu i go long han bilong treseri (takis polisi) na i no IRC (takis edministresen), mi laik tok klia olsem dispela bai i no inap isi na hat long baim takis,” em i tok.

Koim i tok kontribiusen bilong ol woka long ol atorais lokol supa fan olsem Nasfund na Nambawan Supa “I no gat takis taim ol i peim aut.”

“Dispela em i bikos ol woka i bin baim takis long dispela kontribiusen we ol i bin didaktim long pe bilong ol pinis.”

 Em i tok tasol ol inap kisim takis olsem interes long fan na ol narapela inkam bilong investmen bilong ol.

Koim i tok tu olsem dividen bilong ol atorais  supaenuesen fan i no tok orait long kisim takis long (seksen 189B (4) (F) bilong takis Ekt.

“Ol kampani kontribiusen i no bilong kisim takis o mekim profit bilong ol atorais supa fans.

“As bilong dispela em i olsem ol kampani o gavman dipatmen i no inkam bilong ol atorais supa fan tasol ol i holim mani bilong ol woka olsem trasti inap ol i givim i go bek long ol taim ol i lusim wok.

“Long wankain pasin givim aut bilong kampani o dipatmen kontribiusen i save kamap olsem inkam bilong ol woka na ol i ken kisim olsem takis,” Koim i tok.

Em i tok mak bilong takis supaenuesen bai i ken givim i go long ol woka em i antap na i no olsem ol i save kisim long pe bilong ol.

Tasol em i tok Kapital Gein Takis Rigim (CGT) ol i redim pepa pinis na em i no kamap lo yet.

Joseph Dawai i raitim