LAS wik ol fama bilong Kunua long Wes Kos Bogenvil i bin kisim trening bilong kakao prodaksen. Dipatmen bilong Praimeri Indastri (DPI) aninit long Atonomus Bogenvil Gavman i bin oganaisim na fandim dispela trening we Australian Centre for Innovative Agriculture Research (ACIAR), DPI yet na ol Kakao Bod opisa i karimaut.

Namba mak bilong ol fama husat i bin kamap long dispela trening em 30. Ol fama i kam long ol wod insait long Mahari Konstituensi.

Bikpela astingting bilong dispela trening em long apim prodaksen bilong kakao, impruvim kwaliti bilong kakao na apim revenyu bilong kakao long Kunua distrik na ol arapela eria long Bogenvil.

Ekting Sekretri Kenneth Davaro na Rijinal Kakao Kodineta bilong Bogenvil, Mark Tunia Lamur i bin stap na opim dispela trening.

Ol fama i bin amamas tru long kisim dispela trening. Ol go pas i givim strongpela toktok long ol fama long yusim save ol i kisim long dispela trening bikos em bai helpim ol long lukautim ol blok bilong ol.

Mista Lamur i tok em na tim bilong em i hop long karimaut dispela trening long olgeta ples long Bogenvil. Tasol i dipen long fanding na sapot bilong projek. Dispela projek i nidim mani long ranim insait long olgeta hap bilong Bogenvil.

Sapos trening i karamapim olgeta eria long Bogenvil, em i ken bringim level bilong kakao prodaksen i go antap na impruvim ikonomi bilong Bogenvil na tu ol fama i ken kisim gutpela revenyu bilong sapotim ol famili bilong ol.

Mista Lamur i tok tenkyu long DPI opisa bilong Kunua Distrik, Tomasan Sotutu na ekting DPI Menesres bilong Not Bogenvil, Yvonne Geobun long fasilitetim dispela trening long ol fama.

Carolyne Ketsimur i raitim