WOK mak bilong Kina Benk em long kamapim namba wan benk we i ken sevim gut na inapim laik bilong ol kastoma long PNG nau na long taim bihain.

Long kamapim dispela, Kina i mekim disisen long baim na kisim olgeta bisnis bilong Westpac long PNG na Fiji we bai promotim benk long kamap strong na independen na kisim nem olsem rijinol benk long kantri.

Dispela disisen i soim komitmen bilong Kina benk i go long ol kastoma bilong en. Na long wankain taim bai bringim ikonomik level bilong PNG i go antap insait long Pasifik.

Ol wok bilong fomol sabmisen wantaim ol reguleta i wok long go het yet. Na Kina i bilip olsem benk bai winim plen bilong em long baim Westpac bikos em i gat kepitol na ekspirens. Wantaim dispela win, maket ken kamap gut na mekim benking i kamap isi wantaim gutpela kastoma sevis na tu bringim kost bilong benking i go daun liklik.

Kina i laik kisim Komesel Benking laisens bilong Westpac na kamapim nupela bren we bai resis wantaim Kina Benk yet, BSP na ANZ na strongim na sapotim ol MSME na SME.

Dispela benk bai stap long gutpela posisen long kamapim moa sans bilong ol kastoma long kisim ol prodak na sevis wantaim isi ekses long fanding.

Malti-bren bai impruvim kompetisen, bai impruvim laik bilong ol kastoma na daunim kost bilong benking. Em bai helpim Kina long operet i go bikpela na helpim ol komyuniti we i nidim benking sevis.

Sistem o proses bilong bihainim long mekim benking o bisnis bai stap wankain yet.  Nem bilong benk tasol bai senis.

Dispela nupela benk bai indipenden na sepret long Kina Benk. Na bai stap aninit long lukaut bilong ol PNG bod ov dairekta.

Long wankain taim tu, dispela nupela benk i givim sans long ol pipel bilong PNG long inves na kisim onasip long en.

Carolyne Ketsimur i raitim