Nau em i taim bilong lukluk long statim gen foren investmen long Papua Niugini, Menesing Dairekta bilong Kantri Investmen bilong Investmen Promosen Atoriti (IPA), Clarence Hoot i tok.

Em i tok Business Adventage PNG (BAPNG) em i praioriti bilong IPA long ol yia i kam bihain, we nupela foren investmen lo i kam long Palamen i ken helpim.

“Bai i nogat wanpela gutpela taim long lukluk long kamapim strongpela foren investmen,” Hoot i tok.

Em i tok bikos long Covid-19 pandemik nupela investmen i go antap stat long 30 pesen na i go long 50 pesen.

“Long kisim Foren Dairek Investmen (FDI) i go bek long we em i stap pastaim, yumi mas suruk tripela o foapela taim moa i go antap olsem na yumi mas tingim dispela tu,” em i tokim BAPNG.

Hoot i tok level bilong intanesenel investa diman bilong IPA long 2020 i bin strong moa. Long 2019, we inkris interes long ol kantri olsem Japan na Saina i bin kamap gut. Ol Japan investa i bin laikim ol LNG projek na ol Saina i laikim kontraksen.

“Bai yumi givim inap taim long ol kain bikpela bisnis i stap na salim ol dispela bisnis tasol mi lukim olsem em i asua.”

“Dispela ol maket, yumi inap wok long en longpela taim wantaim helpim bilong ol embisi long Beijing na Tokyo bai i gat bikpela salens long kamapim interes i go long projek.”

“I bin i gat strongpela interes long wok egrikalsa tasol Hoot i toksave olsem salens i stap long dispela sekta.”

Hoot i tok wanpela bikpela tingting bilong dispela yia em long tebolim Investmen Promosen Amanmen Bil long Palamen. Narapela ol lo i bin riviu olsem Risev Ektiviti Lista (aninit long Investmen Promosen Ekt 1992). Ol Asosiesen Inkoperesen Ekt na ol liklik senis i go long kampani Ekt na Bisnis grup Ekt.

Hoot i tok long taim politik bilong PNG i  bin i gat liklik hevi em i bin hat long toktok long  Investmen Promosen Amanmen Bil, “mi stap wantaim namba tri minista na em i lukluk i stap.”

“Long 2018, pastaim gavman bilong Peter O’Neill i dairektim mipela long mekim riviu long Investmen Ekt na Foren Investmen Riviu Bod (FIRB).

“Mipela go het na toktok wantaim ol pipel na redim ol pepa na givim long minista Wera Mori husat i bin sainim ol senis.

“Tupela de bipo long sabmisin i go long han bilong Kabinet ol i bin senisim gavman.”

Hoot i tok tupela taim mipela i stat gen long stretim dispela pepa. Wanpela samting  i stap aninit long IPA em risev lista we ol steit ikonomik sekta i risev nau long ol lokol pipel bilong PNG. Wanpela polisi bilong Marape gavman i tok ol lokol mas kamap papa bilong ol smol na midium entaprais (SME) bisnis.

Hoot i tok wanem samting i stap long lista em gavman bilong de bai strongim tasol IPA mas mekim gut laik na tingting bilong ol lokol PNG i ken wok tu long ikonomik wok bilong ol yet.

Sapos ol kamapim narapela rot bilong ikonomik ektiviti yumi mas lukluk long hamas ol PNG bai inap givim sevis.

“Ol foren bisnis ona i stap pinis long kantri i mas painim eria bilong bisnis ektiviti long putim risev lista bai inap givim taim bilong em i senis,” em i tok.

Joseph Dawai i raitim