OL kopra fama long Kavieng i bin kisim trening bilong wait kopra prodaksen long tripela de. Moa long 180 fama i bin kamap long dispela trening.

Long trening ol fama i kisim skul long rot bilong pikim kokonas, neseri menesmen, long mekim tsakol na wait kopra prodaksen.

Dispela projek CIC na Kavieng Provinsal Edministresin i wokbung wantaim long karimaut.

Namba tu trening bai kamap long Namatanai long Resese ples. Long dispela trening, ol bai skul long mekim sop na oil long kokonas. Ol i no makim taim na deit bilong dispela trening yet bikos long hevi bilong COVID-19.

Dispela em gutpela projek we bai helpim ol yut long ples.  Planti i gat intres bilong mekim mani bilong ol yet na tu kontribiut i go long ikonomi bilong Papua Niugini.

Ol fama i amamas tru long dispela projek bikos em i isi na yu ken salim kwik.

Proses bilong draim wait kopra em i isi. Yu pikim kokonas long blok, bringim i go long draia, rausim skin na draim long san o mekim liklik paia tasol bilong rausim wara long kokonas.

Taim yu putim kokonas long draia, yu mas mekim tripela leya tasol. Namba wan leya i yu mas tanim kokonas i go antap, namba tu namba tri leya yu tanim kokonas i go daun. Mekim liklik paia inap long 10 i go 12 aua.

Kokonas i mas no ken tanim braun. Em i mas stap wait. Long rausim mit bilong kokonas long sel, yu mas yusim mambu, i no naip.

Coconut Risos Limited (RIL) i wok long baim wait kopra long K3 long wanpela kilogrem long Kavieng.

CRL i wok long visitim ol fama long ol liklik ples we ol i draim wait kopra na baim long ol. Ol fama i no nid long tromoi mani long karim kopra bilong ol i go long ples bilong baim.

Byron Yowagi, Provinsal Kokonas Divelopmen opisa i tok long pinis bilong dispela yia 2021, CRL bai stat long baim tsaol bilong kokonas sel.

Carolyne Ketsimur i raitim