EM i namba wan taim, wanpela lokal level gavman (LLG) eria long Gumine distrik long Simbu provins i gat ekses long maket bilong salim kaukau long Kundiawa taun.

Projek Teknikal Lida, David Kaupa i tok Gumine distrik i bin sainim Memorandum Ov Understanding (MOU) wantaim FPDA las yia bilong strongim tingting long divelopim tupela komesel krop, em kaukau na raun anian.

Em i tok tupela namba wan fam ol i bin mekim long Gumine LLG tasol, wantaim 10-pela hap ol i makim bilong planim 3 tan (300 kilo grem) kaukau na 3-pela hap bilong planim raun anian.

Long dispela mun, 7.7 tan (7700 kilo grem) kaukau ol i skelim na putim long bek bilong salim. Sampela ol i putim olsem sid bilong planim na sampela bilong ol kastoma long baim na kaikai.

“Prodaksen bilong kaukau i kamap gut na mipela i amamas. Ol fama i lukim trupela na gutpela risal bilong kaukau long sotpela taim tasol na ol i amamas. Nau olgeta pipel long Dirima-Yani i laik go insait tu long famim kaukau”. Mista Kaupa i tok.

Em i tok moa olsem dispela em i namba wan taim ol fama i salim kaukau long Gumine na Dirima. Nau ol fama i stat putim tingting long faming olsem bisnis bilong ol.

“Ol raun anian i stap long neseri ol i rausim na planim long fil. Risal i soim olsem ol gro gut na helti.

Memba bilong Gumine, Nick Kuman i amamas long lukim  risal bilong projek em yet i bin kamapim wantaim patnasip bilong Fresh Prodice Divelopment Agency (FPDA).

Long wankain taim, Mista Kaupa i tok, narapela tupela LLG long Digine na Kumai- Bomai bai kisim wankain projek klostu taim.

Ol pipel i tok tenkyu long Memba bilong Palamen, Nick Kuman long inves long faming na mekim kamap dispela projek.

Mista Kaupa i tok, Nick Kuman i bihainim dispela rot na askim olgeta pipel long wok long graun.

Em i tok kamap bilong FPDA long Gumine distrik i senisim tingting bilong planti yangpela man na meri long go insait long faming olsem rot bilong kamapim gutpela sindaun long Gumine.