WANPELA stadi i soim olsem prodaksen bilong kopi long Papua Niugini em i stap daunbilo long laspela 10-pela yia i go pinis.

Long yia 1998 i go long 2018, namba bilong kopi prodaksen long PNG i bin go daun long 33 pesen na 28 pesen. Dispela ripot i kam long PNG Nesenel Risets Institiut (NRI).

Prodaksen bilong kopi i pundaun bikos long ol salens ol kopi fama i lukim. Ol salens i soim olsem nogat gutpela fesiliti bilong prosesim kopi, nogat gutpela sevis na nogat inap fanding bilong helpim prodaksen i kamap gut.

Bikos long dispela, NRI Depyuta Dairekta long PNG, Eugene Ezebo na Profesa bilong Federal Yunivesiti bilong Egrikalsa, Carolyn Afolami i kamap wantaim sampela streteji bilong daunim ol dispela salens.

Ol i tok, “PNG i gat gutpela envairomen na klaimet bilong groim namba wan kopi”.

Ol i sanap long dispela tok na ol i askim gavman i mas promotim gutpela egrikalsa sevis long olgeta grup bilong kopi fama na i no long wanpela grup tasol. Gavman i mas kisim ol opisa i gat gutpela save long rot bilong planim kopi, bai ol i ken skulim gut ol fama. Gavman i  mas sapotim ol fama na givim fanding bilong helpim ol kopi fama grup long gat ol miling masin bilong ol yet.

Na moa yet gavman i mas givim fanding long ol risets insitiut olsem CIC na PNG NARI bai ol i ken go het long mekim moa risets bilong kopi na divelopim hai kwaliti kopi long PNG.

Sapos dispela i kamap, PNG i ken groim na impruvim prodaksen bilong kopi na salim long ol arapela kantri.