Galp Gavana Chris Haiveta i tokim Praim Minista James Marape long no ken mekim wankain asua olsem ol i bin mekim long PNG LNG.

“Total em i nupela kampani, tasol yu na mi bin ekspiriensim olsem Exxon Mobil na Oil Search promisim ol papagraun, provinsol gavman, na Nesenel Gavman long ol agrimen ol i bin sainim. Tasol, tupela Joint Ventsa patna i bin mekim giaman promis na givim gavman sea bilong em na ol i no givim sea long ol papagraun,” Gavana Haiveta i tok.

“Nau, mi laik tokim yu olsem  Steit bin kisim sea investa promis long givim tasol ol papagraun i no bin kisim wanem samting ol i bin promisim ol. Olsem na long dispela ekspiriens mi laik strongim yu, Praim Minista bilong dispela nesen long kamapim agrimen bai inap helpim ol papagraun.

I ken mekim ol paulim yu bikos yumi i no bin luksave long ol LO pastaim long sainim Laisins Beis Benefits Sering  Agrimen (LBBSA) na Umbrella Beis Benefits SeringAgrimen (UBBSA) na nau yumi hat wok I stap. Long dispela as, yumi mas no ken mekim wankain asua long projek i laik kamap long Galp provins o sampela hap bilong kantri.

Long dispela as mi sanap strong long ol toktok bilong mi na tok gen olsem Galp provinsol gavman na ol papagraun i stap long helpim yu, yumi no ken kamapim belhevi namel long nesenel gavman na divelopa na go long kot,” em I tok.

Mista Haiveta i tok tu olsem i gat sampela hevi Mista John Mark husat i makim maus bilong Total Kampani i tokaut olsem “bai i gat pea na bai mipela protektim interes bilong Galp pipel” na mi tok tenkyu long olgeta lain husat mekim dispela wok bilong kamapim Galp LNG.

“Olsem Gavana bilong provins, mi makim ol pipel bilong Galp provins long projek eria long Ihuna Baimuru wantaim ol wod lida, mi laik tok tenkyu long Misita bilong Petroleum Hon. Kerenga Kua na gavman bilong Praim Minsta James Marape mekim dispela toktok inap tupela yia na nau projek i redi long stat long dispela yia.

“Mipela olsem sitisen nao na bilong risos bilong Papua LNG, mipela i amamas long lukim olsem Joint Vensa wantaim Steit na Total Kampani i kamapim wantaim gutpela tingting long helpim ol pipel na bilong kantri bilong yumi,” Gavana Haiveta i tok.

Joseph Dawai i raitim