GAVMAN bilong Papua Niugini i givim tok orait long COVAX Fesiliti long bringim COVID-19 sut marasin o veksin i kam long PNG.

Nesenel Dipatmen bilong Helt na Wol Helt Ogenaisesen i nau redi long kisim ol AstraZeneca/Oxford veksin na i wok long mekim ol plen bilong karimaut dispela sut marasin long kantri.

AstraZenecca em i wanpela bilong ol tupela veksin we Emergency Use Listing (EUL) bilong WHO i tok orait long en. Ol strongpela reguletori atoriti long Europe, United Kingdom na India i bin tok orait long yusim long taim bilong imejensi.

Ol kantri olsem Europe, UK na India i nau yusim dispela veksin. Planti milien dos o sut bilong dispela veksin em ol i givim gut long ol pipel long ol dispela kantri pinis.

Taim bilong givim dispela veksin em i sanap olsem; tupela sut long wan wan manmeri o pikinini. Ol i bai kisim wanpela sut pas na bihain long 8-pela wik i go inap long 12 wik taim ol i bai kisim namba 2 sut bilong banisim ol yet long COVID-19. Ol i bai kisim sut long han bilong ol.

PNG bai kisim 588,000 dos o sut bilong AstraZenecca (AZ) veksin bipo long pinis bilong mun Jun 2021. Dispela em namba wan sea bilong PNG. Ol dispela veksin bai kam long PNG long tupela sipmen. Namba wan sipmen bilong 288,000 sut bai kamap long PNG long pinis bilong mun Mas na stat bilong mun Epril. Namba tu sipmen bilong 300,000 sut bai kamap long PNG long namel long mun Me na Jun long dispela yia.

Ol helt kea wokmanmeri na ol arapela bikmanmeri we i kamapim 3 pesen bilong populesen bilong kantri PNG bai go pas long kisim ol dispela sut. Taim ol i makim bilong givim sut em long pinis bilong mun Epril o stat bilong mun Me.

Ol helt woka i go pas long daunim COVID-19 bai kisim sut pas na bihain long narapela hap bilong dispela yia bai ol manmeri na pikinini i stap long mak nogut bai kisim sut.

“Mipela i askim olgeta provins long givim namba bilong ol wokmanmeri i go pas long daunim COVID-19 long provins bilong ol bai dispela i helpim mipela long mekim plen bilong givim sut taim sut i kam kamap long kantri,” Seketeri bilong Helt Dokta Osborne Liko i tok.

“Taim dispela namba wan mak i pinis bai mipela i surik i go long namba 2 mak long namba 2 hap bilong dispela yia we bai mipela i givim sut long ol manmeri na pikinini i stap long mak nogut kain olsem ol sikmanmeri na pikinini na ol lapun.”