LONGPELA lain ausait long Nasfund opis long 4 mail i save mekim ol kastoma i save wet sampela aua long kamap long kaunta long harim olsem eplikesen bilong ol i no redi.

“Olgeta taim ol i save tok kam bek neks wik tasol taim ol kastoma i kam bek gen bai ol i senisim toktok na mekim narapela tok gen.”

COVID-19 sik i mekim gavman dipatmen na ol praivet sekta long rausim planti ol wok man na meri long wok na dispela i mekim planti ol famili i painim hat tru long stap gut long ol taun na siti. Olsem na planti pipel i traim long rausim Nasfund kontribiusen bilong ol long helpim ol yet.

Wanpela kastoma James Ketela i tokim ripota olsem em i bin putim witdro aplikesen bilong em tripela (3) mun i go pinis na long pinis bilong las mun ol i bin apruvim tasol ol i no salim mani i go yet long akaun bilong em yet.

Mista Ketela i tok taim em i save go askim ol opisa long kaunta, ol i save tokim em olsem menesa i no sainim apruvel long rilisim fans yet na klostu foapela wik i pinis nau.

Em i tok i luk olsem ol nupela sistem bilong Nasfund i no wok bikos wok bilong ol isi isi tru na planti ol manmeri i les pinis long ol sevis bilong ol.

“Mi ritim planti toktok bilong Nasfund long niuspepa tasol mi ting ol i no smat long mekim kain wok olsem long helpim ol kastoma bilong ol.

“Mi no ting nupela sistem bilong ol bai inap helpim taim ol dispela wokmanmeri i stap yet long wok na i mekim wankain pasin olsem olgata taim,” em i tok.

 Mista Ketela i stap na wok long Pot Mosbi tasol long taim bilong Coronavirus na lokdaun. Ol i bin pinisim em long wok olsem na em i bin salim meri na pikinini bilong em i go long ples na em yet i stap long kisim nasfund mani bilong em.

Taim ripota i askim Bank of Papua New Guinea Sinia Opisa Kopereit  sevis Elisabeth Gima long inap long em i edvaisim Nasfund na em i tok ‘em i wok long salim email long nasfund ofis long 4 mail tasol ol i no bekim email bilong em yet.

Joseph Dawai i raitim