Papua Niugini i gat planti risos long groim ikonomik bilong kantri tasol husat inap helpim.

Dispela poto i soim piksa bilong ol bek kaukau long Gerehu maket i bagarap i stap. Ol dispel bek kaukau ol i bin kisim i kam daun long Lae long Mt. Hagen na baim freit sas na salim long sip i kam long Pot Mosbi.

Planti taim gavman i save lukluk tasol long ol risos olsem maining, timba, pis na ol bikpela risos long ol investa long kam kisim tasol planti ol samting yumi yet ol lokol pipel inap long kamapim long helpim yumi yet em yumi save lus tingting long kamapim na strongim ikonomi bilong kantri.

I gat planti pipel long rural eria i wok long wetim gavman long givim sans olsem kamapim maket long salim ol dispel bek kaukau i go long ovasis maket o salim i go long ol pipel long sampela kantri i stap hangre.

Poto na stori: Joseph Dawai