BIHAINIM wok mentenens na apgred bilong Manus ples balus, Air Niugini bai statim ran bilong Boeng 737 i go long Momote ples balus long Manus Ailan.

Ripot i tokaut olsem, Boeng 737 balus bai mekim namba wan ran bilong em i go long Manus long Ista Sarere 3, Epril long 10:35 long mrning.

Bihain long dispela namba wan ran, Boeng 737 balus bai mekim nomol ran bilong em long olgeta Sarere i go long Momote ples balus.

Fokker balus bai go het long mekim ran bilong em long ol arapela de bilong wik.

“Boeng 737 i senisim Fokker we i bin save mekim dispela ran. Bikos long dispela, Air Niugini nau bai yusim Fokker long mekim ran long ol arapela ples balus,” Jenerel Menesa bilong Komesel Sevis long Air Niugini, Dominic Kaumu i tok.

Em i tok Manus em i impoten destinesin bilong Air Niugini, na Boeng 737 i ken karim 144 pasindia long wanpela ran. Namel long dispela 144 pasindia sia, i gat 16 bisnis sia na 128 ikonomi sia.

Em i antap moa long Fokker 100 we i gat 101 sia tasol. Na bai inapim laik bilong ol pasindia husat i laik trevol i go long Manus. Na long wankain taim em i ken karim moa kago long Fokker 100.

Bikos long dispela em bai helpim  long karim planti saplai na ikwipmen i go long Manus na tu karim moa kaikai bilong solwara na ol arapela kago i go long Mosbi na ol arapela kantri.

Ran bilong Boeng 737 namel long Pot Mosbi na Manus bai kisim wanpela aua na 20 minis.

Boeng 737 balus i save mekim ran bilong em long Maunt Hagen na tripela ran long wanpela wik i go long Alotau.

“Mipela i amamas long givim dispela gutpela sevis i go long ol kastoma bilong mipela,” Mista Kaumu i tok.

Air Niugini i go het long mekim wok bilong em wantaim strongpela lo na oda bilong COVID-19.