LONG Fraide 15, Janueri Nawi Mabo i stori long hau em i helpim wanpela man pik i kaikaim em. Long avinun mi sindaun long haus i stap na wok long mekim plen bilong Sarere taim mi lukim wanpela toksave long Facebook. Dispela toksave i kam long Sally Lloyd husat i stap long Brisbane.

 Sally em wanpela meri i sanap na pait long gutpela sindaun bilong ol pipel long Strickland long Bosavi eria, ples em i bin stap long en taim em i liklik pikinini bilong tupela misineri.

Dispela mesij em toksave bilong wanpela man na meri husat i kisim bikpela bagarap taim wel pik i pait wantaim ol.

Dispela toksave i bin kam long Fuma, wanpela liklik komyuniti long eria, na bihain HF redio i ripotim i go long Mougulu Helt Senta. Bihain ol wokmanmeri long Mougulu Helt Senta i salim toksave i go long Sally husat i salim i kam long mi long Maunt Hagen.

Ol kain hevi olsem i save hat tumas long kisim helpim kwiktaim long rurel eria. Tasol taim mi lukim mesij mi hariap tru ringim Sally na painimaut olsem dispela hevi i nidim helpim kwiktaim.

Mi salim toksave i go long olgeta save pes husat mi tingim i ken helpim long Rumginae na Mougulu haus sik.

HF redio em wanpela rot tasol bilong toktok long ol lain long Fuma haus sik, na tu em leit aua na mi no tingting long traim redio. Long wankain taim, nes long Fuma haus sik i bin stap long holide long ples bilong em.

Olgeta dispela i mekim hevi i go bikpela moa.

Bihain long sampela taim, ol wokmanmeri  long Mougulu haus sik i bekim mesij bilong mi. Taim mi kisim olgeta infomesen mi nidim long ol, mi ringim Israel Neale long operesin tim husat i wanbel long mekim medivek (rot bilong karim sik manmeri na pikinini long balus long kisim helpim) ran long neks de.

Tasol long dispela taim, mipela i no bin kisim yet tok orait i kam long haus sik bilong mekim medivek bikos i no gat inap infomesin. Israel nau i askim long toktok long HF redio long kisim moa toksave na wankain taim toksave long ol pailat long redi.

Long bikpela moning taim mi stap long beis, mi kisim wanpela  telefon kol i kam long pailat Mathias Glass. Em i tok em i redi long kam long beis na flaim medivek balus. Mi toksave gut long em olsem mipela i no kisim yet tok orait bilong dokta long mekim medivek. Tasol mipela i wanbel long redi tasol na wet.

Bihain long sampela taim, Mathias na narapela pailat Philipp Sutter i kamap long beis na stat long mekim plen bilong ran bilong balus.

Mipela i wet longpela taim, tasol nogat toksave i kam. Long dispela taim nau, mipela i tingting long go het wantaim medivek plen o long wetim moa toksave. Taim mipela i wok long sekim ol skeduel stap, Sally i salim toksave long nupela infomesen em i kisim long wanpela wokman bilong Mougulu haus sik.

Paul, em wanpela gutpela dediketet wokman bilong Mougulu Helt Senta. Bihain long em i pinis toktok wantaim ol pipel long Fuma long HF redio, mi ringim em na mi wantaim tupela pailat i harim nius bilong em.

Long wankain taim yet, Pailat Philipp i ringim Israel na em tu i harim i stap.

Paul i tok wanpela man na meri i kisim bikpela bagarap taim wel pik i pait wantaim ol. Man i kisim moa hevi long skin bilong em na em i lusim planti blut. Em i hap indai planti taim bihain long wel pik i pait wantaim em.

Dispela wel pik i bin kisim bikpela bel hevi bihain long em i kamaut long trep. Pik i bin go na stap klostu long rot i go long ol gaden bilong ol pipel long komyuniti.

Bihain long mipela harim dispela ripot, Israel i givim tok orait na wan tu tasol mipela i stat long redim medivek.

Enjinia Menesa John Kamalan i bin stap long dispela taim na sapotim mipela. Philipp i sekim olgeta samting long balus, Alex Lewa Menesa bilong Maunt Hagen beis i kam helpim mipela tu long redim ol narapela samting.

Taim mi wakabaut i go long balus, mi luksave olsem ol enjinia, pailat na ol arapela wokmanmeri i sanap long sekol na pre stap. Aiwara pundaun long ai bilong mi taim mi lukim ol.

Mi no bin redi long lukim samting i bin kamap long Fuma. Long taim mipela i kamap, mi lukim ol i karim dispela man pik paitim long bet ol i wokim wantaim bus diwai. Mi sori tru bikos em kisim bikpela bagarap, winim ol arapela.

Mi tanim lukluk long Mathias na Samuel na mipela i wanbel olsem mipela i mekim gutpela tingting long  kam helpim dispela man maski i bin gat hevi bilong kisim infomesen.

Dispela hevi i givim bikpela wari long mi.

Taim mipela i putim tupela man na meri i go insait long balus, mi lukluk long olgeta pipel husat i bin bringim tupela man na meri kam. Ol i luk sori na wari tru. Mi lukim dispela, na mi askim Mathias na Samuel bai mipela i pre wantaim komyuniti.

Mipela i kisim tupela i go long Rumginae. Ran bilong balus i kisim wan na hap aua. Insait long balus mi wok long sekim tupela klostu, klostu. Man i no toktok gut tumas tasol meri i ken sindaun na i ken toktok gut.

Taim mipela i kamap long Rumginae, mitupela Samuel i helpim long karim tupela man na meri i go insait long haus sik we ol nes i ken helpim ol.

Mipela i wanbel olsem ol i stap gut long lukaut bilong ol nes na redi long go bek long balus, mi harim liklik nek bilong man i tok tenkyu. Maski em i pilim bikpela pen, em i traim long tok tenkyu long mipela.

Mipela i go bek long balus na flai i go bek long Maunt Hagen.

Insait long balus, mi sindaun na lukluk i go ausait. Mi lukim blupela skai na waitpela klaut. Ol maunten na mi traim long tingim heven. Olgeta hevi na pen bai i no moa stap long heven. Mi tingim dispela man husat i pilim bikpela pen. Wanpela de, olgeta dispela hevi bai pinis.

Mi tingim taim yumi go long heven na man husat yu helpim bai kam na tok tenkyu long yu. Bai yu paul na askim bilong wanem yu tok tenkyu?

Em bai tok, “O bikos yu bin helpim mi taim mi bin kisim bikpela bagarap”, “O bikos yu bin redim balus long karim mi i go long haus sik”, “O bikos yu bin pre long mi na God i helpim mi” na moa.

Olgeta manmeri husat i save helpim ol arapela i mas kisim luksave long soim laik bilong God long helpim ol arapela.

Wok bilong mi long MAF em Graun Operesen Trening Kodineta. Tasol long taim bilong kain hevi olsem, mi lukim mi yet olsem mi ken helpim ol lain husat i kisim bikpela hevi.