“ABATOA (Haus bilong katim abus) long Wariman long Wewak, Is Sepik Provins bai kamap malti milien kina bisnis. Bikpela tok tenkyu i go long Gavman,” Laipstok Divelopmen Koporesen Menesing Dairekta, Terry Koim i tok.

Em i mekim dispela tok long taim em na Edministreta bilong Is Sepik, Dokta Clement Malau husat i makim East Sepik Provinsal Administration (ESPA) i sainim Memorandum ov Understanding (MOU) long Wewak.

Dispela MoU bai opim rot bilong kirapim bek  dispela Abatoa bihain long Livestock Development Corporation (LDC) i bin pasim operesin long 1990.

Long statim projek, LDC, ESPA na DDA (WDDA) bai kisim bek ol propeti long ol iligel setla. Bihain ol bai askim ol investa husat i gat intres long wokbung wantaim ol na kamapim join vensa kampani.

Mista Koim i tok, astingting bihain long dispela plen em long kamapim gutpela, konsisten na isi ekses long saplai bilong fres abus long ol pipel bilong PNG.

Is Nu Briten na Isten Hailans i soim intres tu long gat wankain projek wantaim LDC long ol provins bilong ol.

Mani mak bilong bringim fasiliti bilong prosesim mit long Wariman inap long K10 milien. Na Gavman i putim K1 milien pinis i go long dispela projek. Kantri bai ekspotim mit i go long Saut Is Esia maket na long wankain taim ol lokal yet bai baim.

LDC Menesmen wantaim ol papa graun i pasim tok pinis na ol i wanbel long karimaut wok.

Abatoa bai kamapim mani mak olsem K30 milien i go K50 milien long wanpela yia.

Mista Koim i tok LDC bai lukautim yet ol enimal bilong katim na kisim mit na bilong briding (kamapim na groim ol nupela enimal). Tasol i gat toktok i stap bilong ol fama husat i laik salim ol enimal bilong katim olsem mit.

Abatoa bai kamapim 500 sans wok bilong ol lokal manmeri.  

Mista Koim i askim olgeta stekholda long wokbung wantaim LDC sapotim PM James Marape na Egrikalsa na Laipstok Minista John Simon long karimaut wok bilong dispela projek.