“NESENEL Gavman i mas save long wok o lo bilong National Gas Corporation Limited (NGCL) long haidrokabon (petroleum na neserel gas) divelopmen long Papua Niugini.”

Ekseketiv Siaman bilong NGCL, Alfred Kaiabe, husat em loya na bipo memba bilong palamen makim Komo-Magarima ilektret i tok long taim bilong sainim Memorandum Ov Understanding (MOU) namel long NGCL na 10-pela papa graun bilong Wafi-Golpu main long Morobe Provins.

Dispela MoU em bilong divelopim na saplaim pawa long Wafi-Golpu main.

Kaiabe i tokaut olsem, lo i tok NGCL i mas stap oltaim insait long ol plen bilong Gavman o ol State Negotiating Team (SNT). Stat long ol divelopmen bung i go long projek agrimen saining.

Em i tok NGCL i bin kamap aninit long Oil na Gas Ekt long 1998. Na em i mas save long olgeta wok na prodaksen bilong petroleum (gas na wel) long Papua Niugini.

Long wik i go pinis, Mista Kaiabe i bin tok Stet i no bin givim luksave long NGCL long taim em sainim MoU wantaim PNG LNG projek long 2008 long Kokopo.

Na long PNG-Queensland paiplain projek, we i bin pinis long 2002, NGCL i bin kisim 4 pesen stek long Hides PDL 1. Dispela em daunbilo long tru tru mak onasip bilong 12.5 pesen.

Nesenel Gavman i bin gat luksave long NGCL long taim Nesenel Executive Council (NEC) i bung na mekim disisen bilong ol ges projek. Tasol long taim bilong sainim PNG LNG agrimen, NGCL i no bin kisim luksave.

Siaman Kaiabe i tok, dispela pasin i mas no ken kamap gen long ol narapela gas divelopmen olsem Papua, P’ynyang, Pasca/Twinza LNG projek.

Saining bilong MoU i bin kamap gut na dispela i kamap wanpela bikpela rot bilong PNG long yusim risos bilong em long kamapim divelopmen.

Margareth Kilamu, wanpela meri lida i tok, ol pipel long PNG i mas lusim ol kainkain pret tingting na wokbung wantaim long ol risos divelopmen projek.

Ol opisa bilong PNG Power LTD, Dipatmen bilong Petroleum na Profesa Ralph Mana bilong UPNG i bin witnesim dispela saining.

Cyril Gare i raitim