AIR Niugini i tok gutbai long namba wan nesenel pailat, Kepten Paul Kodor husat i pinis wok olsem pailat long Fraide 19, Februeri, bihain long em i wok wantaim kampani long 34 krismas.

Kepten Kodor i bin statim wok pailat bilong em wantaim Dash 7 balus. Bihain em i ranim F28 long 1994, Airbus A310 long 1999 bihain Boeng 767.

Kepten Kodor i bin mekim laspela ran bilong em long balus Boeng 767 long Februeri 2. Long wankain taim em i winim 65 long krismas bilong em.

Em i kamap namba wan Nesenel pailat bilong Air Niugini long pinis wok aninit long PNG Eviesin lo long 65 krismas.

Ol wanwok, famili na Air Niugini Menesmen i bin tok gutbai long em wantaim kaikai, keik, wain na ol presen.

Long makim Air Niugini, Sif Ekseketiv Opisa, Bruce Alabaster i tok tenkyu long Kepten Kodor long sevis bilong em.

Em i tok ol i sori long lusim gutpela wokman tasol bikpela amamas olsem Air Niugini i lukim namba wan pailat bilong PNG i ritaia long ranim balus.

“Tenkyu Kepten Paul Kodor long sapot yu givim long Air Niugini.  Tenkyu long wok bilong yu long menesmen na trenim ol narapela pailat. Tenkyu long hatwok, dedikesin na loyalti yu givim long Air Niugini.”